«Пахтакор» ўтган мавсумни Англия клубида ўтказган футболчини ўз сафига қўшиб олди

Англиянинг «Блекпул» жамоаси футболчиси Оливер Шаркич фаолиятини «Пахтакор»да давом эттиради. Бу ҳақида жамоа матбуот хизмати маълум қилди.

Ҳужумчи инглиз жамоасини эркин агент сифатида тарк этди ва «шерлар» билан 2022 йил сўнгига қадар мўлжалланган шартномага имзо чекди.

Маълумот учун, Шаркич 1997 йилнинг 23 июлида Англиянинг Гримсби шаҳрида таваллуд топган. Оливер «Андерлехт» ва «Бенфика» жамоалари тарбияланувчиси ҳисобланади. Ҳужумчи фаолияти давомида «Фафе», «Лидс», «Баракалдо», «Бартон Албион», «Мансфилд Таун» каби жамоаларда тўп сурган. Шаркич Черногория терма жамоасининг турли ёш тоифаларида майдонга тушган, «Бенфика» ёшлар жамоаси таркибида Чемпионлар Лигасида иштирок этган.

Аввалроқ «Пахтакор» Сардор Рашидов, Икром Алибоев, Авазбек Ўлмасалиев, Миржаҳон Мираҳмадов каби футболчиларни ўз сафига қўшиб олганди. Егор Кримец, Анзур Исмоилов ва Марлен Чобанов эса жамоа сафини тарк этди.

«Пахтакор»ни 2021 йилги мавсум чемпионига айлантирган бош мураббий Питер Ҳюистра жамоани тарк этиб, унинг ўрнини Славче Войнески эгаллади.