Усмон Дембеле туфайли Хави ва «Барселона» президенти ўртасида келишмовчилик юзага келди

«Барселона» президенти Хоан Лапорта ва жамоа бош мураббийи Хави ярим ҳимоячи Усмон Дембеле борасида келиша олмаяпти, деб хабар беради Marca.

Манбага кўра, Лапорта Дембеленинг жамоада бошқа ўйнамаслигини истамоқда. Ўз навбатида Хави ҳам Дембеленинг мавсум охиригача клубда қолишини талаб қилмаган. Бироқ у ярим ҳимоячининг юқори маҳоратини инобатга олган ҳолда Дембеленинг жамоага фойдаси тегиши мумкинлигига ишонади.

Хави, шунингдек, Дембеле Пьер-Эмерик Обамеянгнинг жамоага мослашишида муҳим рол ўйнаши мумкин деб ҳисоблайди. Боиси улар бунгача «Боруссия Д» сафида бирга тўп сурган.

Қайд этилишича, яқин кунларда томонлар ўртасида учрашув бўлиб ўтади ва унда Дембеле масаласи муҳокама қилинади.

Эслатиб ўтамиз, Дембеле ва шартномани узайтириш борасида келиша олмаяпти. Аввалроқ «Барселона» футболчи билан шартномани ўзаро келишув асосида бекор қилмоқчи экани хабар қилинганди. Агар Дембеле бунга рози бўлса, у эркин агентга айланади, каталонияликлар эса футболчи янги клуб топгунича унга маошнинг бир қисмини тўлаб беради.

Франциялик футболчи «Барселона» билан шартномани бекор қилишдан бош тортса, клуб буни бир томонлама амалга ошириши мумкин. Бу ҳолатда каталонияликлар Дембелега 30 июнгача (унинг шартномаси шу санада ўз ниҳоясига етади) маошини тўлиқ тўлаши керак бўлади.

24 ёшли футболчи Ла Лига жорий мавсумида 6 та ўйин ўтказиб, 2 та голли узатма муаллифига айланди.