Коррупцияга қарши курашиш агентлиги қурилиш вазири «Трест-12» иши бўйича нега жавобгарликка тортилмаганига изоҳ берди

Коррупцияга қарши курашиш агентлиги сўнгги кунларда агентлик фаолиятига нисбатан ижтимоий тармоқларда билдирилаётган фикрларга муносабат билдирди.

Таъкидланишича, Коррупцияга қарши курашиш агентлиги томонидан зиммасига юклатилган вазифалар қаторида давлат бюджети маблағларидан самарали фойдаланиш ҳамда давлат харидларини амалга оширишда манфаатлар тўқнашувига йўл қўйилгани ва аффилланганлик ҳолатлари бўйича доимий равишда ўрганишлар ўтказиб келинмоқда.

Хусусан, агентлик томонидан 2021 йил давомида давлат харидлари соҳасида ўтказилган мониторинг тадбирлари натижасида республика бўйича бюджет буюртмачиларининг 458 та танловда «Давлат харидлари тўғрисида»ги ва «Рақобат тўғрисида»ги қонунларнинг талабларини бузгани аниқланиб, коррупцияга оид ҳуқуқбузарларликларнинг сабаб ҳамда шарт-шароитларини бартараф қилишга қаратилган 446 та тақдимнома киритилди ва 141 миллиард сўмдан ортиқ бюджет маблағлари мақсадсиз сарфланишининг олди олинган.

Мазкур тадбирлар давомида аниқланган коррупция ҳолатлари юзасидан тўпланган ҳужжатлар ҳуқуқни муҳофаза қилувчи органларга тақдим қилиниб, улар томонидан Жиноят кодексининг турли моддалари билан умумий 49 та жиноят иши ва 24 та маъмурий ҳуқуқбузарликка оид ишлар қўзғатилиши таъминланган.

Шу билан бирга, 2021 йил март—апрель ойларида ўтказилган ўрганишлар давомида қурилиш вазирининг қариндошлари бенефициар бўлган «Трест-12» компанияси 2020 йилда 5 триллион сўмдан ортиқ қийматдаги қурилиш пудрати ишлари билан боғлиқ давлат хариди шартномаларининг ижрочиси бўлгани аниқланган.

Маълум қилинишича, 2021 йил 14 январдаги қонун билан эса Маъмурий жавобгарлик тўғрисидаги кодекси янги — 175-8-модда билан тўлдирилиб, давлат харидлари жараёнидаги аффилланганлик ва манфаатлар тўқнашуви ҳақида давлат харидлари тўғрисидаги қонунчиликда белгиланган тартибда хабар бермаслик хатти-ҳаракатлари учун маъмурий жавобгарлик белгиланган ва ушбу норма 2021 йил 15 апрелдан кучга кирган.

Маъмурий жавобгарлик тўғрисидаги кодекснинг 9-моддасига кўра, Маъмурий ҳуқуқбузарлик учун жавобгарликни белгиловчи ёки жавобгарликни кучайтирувчи ҳужжатлар орқага қайтиш кучига эга бўлмайди, яъни қонун амалга киритилгунига қадар юзага келган ижтимоий муносабатларга нисбатан жавобгарлик чоралари қўлланилмайди.

Шунга кўра, қурилиш вазири томонидан содир этилган хатти-ҳаракатлар 2021 йил 15 апрелга қадар содир этилгани сабабли, унга нисбатан жавобгарлик чоралари қўлланилмаган.

«Шу билан бирга, содир этилаётган қонун бузилишларига имкон бераётган сабаб ва шарт-шароитлар, норматив-ҳуқуқий ҳужжатлардаги бўшлиқлар мунтазам равишда агентлик томонидан таҳлил қилиниб, муаммо ва камчиликларни бартараф қилишга қаратилган таклифлар ишлаб чиқилмоқда.

Жумладан, била туриб манфаатлар тўқнашуви ҳолатларига йўл қўйилганлик хатти-ҳаракатлари ва жуда кўп миқдордаги давлат харидларига оид манфаатли битимлар тузилишига эришиш билан боғлиқ ҳолда содир этилган тақдирда, жиноий жавобгарликни белгилаш, яъни бундай қилмишни формал таркибли жиноят сифатида эътироф этиш таклифи билдирилмоқда», — дейилади агентлик муносабатида.

Фирдавс Абдухолиқов атрофидаги можаролар

Ижтимоий тармоқларда «Севимли» телеканалида эфирга узатилаётган «Сабрия» сериалидаги ахлоқсиз саҳна акс этган кадр тарқалгани, АОКА ҳолат назоратга олиниб, текширув ишлари бошланганини маълум қилганди. Кейинроқ Ўзбекистон Кинематография агентлиги бош директори Фирдавс Абдухолиқов («Севимли» телеканали раҳбари Амира Рашидованинг отаси) хусусий телеканалларда эфирга узатилаётган миллий сериаллар бўйича изоҳ берди.

Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, Ўзбекистонда гендер тенглигини таъминлаш комиссияси аъзоси Саида Мирзиёева ушбу сериалини танқид қилиб, бадиий кенгашлар ва мутасадди ташкилотларни бу каби контентга қонун ва этика нуқтаи назаридан хулоса беришга чақирди. Амира Рашидова эса каналда узатилган беҳаё саҳна юзасидан муносабат билдириб, сериал намойишидан аввал 16+ маркировкасини бергани, қолаверса, «ахлоқсиз» деган айбловни қўйишдан олдин кесиб олинган кадрнинг якунини тушуниш учун фильмнинг яна 3 дақиқасини кўриш етарли эканини билдирганди.

Кейинроқ Ўзбекистон Кинематография агентлиги бош директори Фирдавс Абдухолиқов хусусий телеканалларда эфирга узатилаётган миллий сериаллар бўйича изоҳ берди. Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов Абдухолиқовнинг изоҳига муносабат билдириб, бу каби масалаларни «уйда келишиб олиш» кераклигини киноя қилди.

«Фирдавс Абдухолиқов ‘Севимли’ каналида эфирга узатилган ‘Сабрия’ сериали ҳақиқатан ҳам бадиий ва мазмунан саёз, телеканал таъсисчилари ва ижодий жамоаси буни, албатта, инобатга олиб, зарур ташкилий чора-тадбирларни кўриши даркор деб, муносабат билдирибди. Шу масалани уйда келишиб олсангиз бўлмайдими? ‘Qalampir.uz’нинг ёзишича, ‘Севимли’ канали қизингиз ва ўғлингизга ҳам тегишли, сериалларнинг давлат маблағлари эвазига асосий буюртмачиси эса ўзингиз, кинолар сифатига ҳам асосий масъул ўзингиз бўлсангиз», – деб ёзганди Комил Алламжонов.

Шундан сўнг Кинематография агентлиги раҳбари Фирдавс Абдухолиқов атрофидаги манфаатлар тўқнашуви юзасидан текширув тайинланди. Коррупцияга қарши курашиш агентлиги томонидан Кинематография агентлиги томонидан шартномалар тузилишида ва давлат субсидияси маблағларининг тақсимланишида манфаатлар тўқнашувига йўл қўйилгани ҳолатлари аниқланган.