Ўзбекистон президентининг 2 февралдаги 110-сонли қарорига кўра, Шаҳрилло Маҳмудов ва Абдулло Аслонов туризм ва спорт вазирининг ўринбосарлари лавозимига тайинланди, деб хабар беради вазирлик матбуот хизмати.
Маълумот учун, Абдулло Аслонов 1984 йил 8 июль куни Самарқанд вилоятида туғилган. 2014 йилда Самарқанд давлат чет тиллар институти магистратурасини тамомлаган. Шунингдек, у Regent London (Англия), Kings Institute (Англия), Marlborough College of Businnes and Technology (Англия) талабаси бўлган.
Кўп йиллар давомида Аслонов «Камолот» ёшлар ижтимоий ҳаракати тизимида фаолият юритган. 2020 йилдан Олий Мажлис Қонунчилик палатаси Халқаро ишлар ва парламентлараро алоқалар қўмитасининг аъзоси ҳисобланади.
Шаҳрилло Маҳмудов 1970 йил 13 сентябрда Бухоро вилоятида туғилган. У 1992 йилда Бухоро давлат педагогика институтини «жисмоний тарбия ўқитувчиси» йўналишида тамомлаган. 2013 йилдан буён Ўзбекистон оғир атлетика федерацияси раисининг биринчи ўринбосари лавозимида фаолият юритган.
Маҳмудов 2002 йилда «Ўзбекистонда хизмат кўрсатган спорт устози» фахрий унвони, 2016 йилда «Меҳнат шуҳрати» ордени ҳамда 2021 йилда «I даражали Соғлом авлод учун» ордени билан мукофотланган.
Таъкидланишича, Ўткир Саидов ва Авазжон Каримов бошқа ишга ўтиши муносабати билан туризм ва спорт вазирининг ўринбосари лавозимларидан озод этилган.
Аввалроқ Халқаро ислом академияси ректори президент маслаҳатчиси этиб тайинлангани, Дин ишлари бўйича қўмита раисига биринчи ўринбосар тайинлангани, Президент администрациясининг масъул ходими Ангрен шаҳрига ҳоким бўлгани, Абдулла Азизов ОКМК бошқарув раиси ўринбосари этиб тайинлангани тўғрисида хабар берилганди.
Изоҳ (0)