Korrupsiyaga qarshi kurashish agentligi so‘nggi kunlarda agentlik faoliyatiga nisbatan ijtimoiy tarmoqlarda bildirilayotgan fikrlarga munosabat bildirdi.
Ta’kidlanishicha, Korrupsiyaga qarshi kurashish agentligi tomonidan zimmasiga yuklatilgan vazifalar qatorida davlat budjeti mablag‘laridan samarali foydalanish hamda davlat xaridlarini amalga oshirishda manfaatlar to‘qnashuviga yo‘l qo‘yilgani va affillanganlik holatlari bo‘yicha doimiy ravishda o‘rganishlar o‘tkazib kelinmoqda.
Xususan, agentlik tomonidan 2021-yil davomida davlat xaridlari sohasida o‘tkazilgan monitoring tadbirlari natijasida respublika bo‘yicha budjet buyurtmachilarining 458 ta tanlovda “Davlat xaridlari to‘g‘risida”gi va “Raqobat to‘g‘risida”gi qonunlarning talablarini buzgani aniqlanib, korrupsiyaga oid huquqbuzarlarliklarning sabab hamda shart-sharoitlarini bartaraf qilishga qaratilgan 446 ta taqdimnoma kiritildi va 141 milliard so‘mdan ortiq budjet mablag‘lari maqsadsiz sarflanishining oldi olingan.
Mazkur tadbirlar davomida aniqlangan korrupsiya holatlari yuzasidan to‘plangan hujjatlar huquqni muhofaza qiluvchi organlarga taqdim qilinib, ular tomonidan Jinoyat kodeksining turli moddalari bilan umumiy 49 ta jinoyat ishi va 24 ta ma’muriy huquqbuzarlikka oid ishlar qo‘zg‘atilishi ta’minlangan.
Shu bilan birga, 2021-yil mart—aprel oylarida o‘tkazilgan o‘rganishlar davomida qurilish vazirining qarindoshlari benefitsiar bo‘lgan “Trest-12” kompaniyasi 2020-yilda 5 trillion so‘mdan ortiq qiymatdagi qurilish pudrati ishlari bilan bog‘liq davlat xaridi shartnomalarining ijrochisi bo‘lgani aniqlangan.
“Shu o‘rinda ta’kidlash joizki, ushbu o‘rganishlar o‘tkazilayotgan davrda hali milliy qonunchiligimizda davlat xaridlari jarayonidagi affillanganlik va manfaatlar to‘qnashuviga yo‘l qo‘yganlik uchun javobgarlik choralari belgilanmagan edi”, — deyiladi munosabatda.
Ma’muriy javobgarlik to‘g‘risidagi kodeksning 9-moddasiga ko‘ra, Ma’muriy huquqbuzarlik uchun javobgarlikni belgilovchi yoki javobgarlikni kuchaytiruvchi hujjatlar orqaga qaytish kuchiga ega bo‘lmaydi, ya’ni qonun amalga kiritilguniga qadar yuzaga kelgan ijtimoiy munosabatlarga nisbatan javobgarlik choralari qo‘llanilmaydi.
Shunga ko‘ra, qurilish vaziri tomonidan sodir etilgan xatti-harakatlar 2021-yil 15-aprelga qadar sodir etilgani sababli, unga nisbatan javobgarlik choralari qo‘llanilmagan.
Kinematografiya agentligi bo‘yicha o‘tkazilgan o‘rganishlarda esa 2021-yil may oyi va undan keyingi paytdagi moliyaviy jarayonlar tahlil qilinib, ushbu davr mobaynida aniqlangan qonunbuzilish holatlari bo‘yicha to‘plangan materiallar Bosh prokuraturaga yuborilgan.
Jumladan, bila turib manfaatlar to‘qnashuvi holatlariga yo‘l qo‘yilganlik xatti-harakatlari va juda ko‘p miqdordagi davlat xaridlariga oid manfaatli bitimlar tuzilishiga erishish bilan bog‘liq holda sodir etilgan taqdirda, jinoiy javobgarlikni belgilash, ya’ni bunday qilmishni formal tarkibli jinoyat sifatida e’tirof etish taklifi bildirilmoqda”, — deyiladi agentlik munosabatida.
Firdavs Abduxoliqov atrofidagi mojarolar
Ijtimoiy tarmoqlarda “Sevimli” telekanalida efirga uzatilayotgan “Sabriya” serialidagi axloqsiz sahna aks etgan kadr tarqalgani, AOKA holat nazoratga olinib, tekshiruv ishlari boshlanganini ma’lum qilgandi. Keyinroq O‘zbekiston Kinematografiya agentligi bosh direktori Firdavs Abduxoliqov (“Sevimli” telekanali rahbari Amira Rashidovaning otasi) xususiy telekanallarda efirga uzatilayotgan milliy seriallar bo‘yicha izoh berdi.Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, O‘zbekistonda gender tengligini ta’minlash komissiyasi a’zosi Saida Mirziyoyeva ushbu serialini tanqid qilib, badiiy kengashlar va mutasaddi tashkilotlarni bu kabi kontentga qonun va etika nuqtayi nazaridan xulosa berishga chaqirdi. Amira Rashidova esa kanalda uzatilgan behayo sahna yuzasidan munosabat bildirib, serial namoyishidan avval 16+ markirovkasini bergani, qolaversa, “axloqsiz” degan ayblovni qo‘yishdan oldin kesib olingan kadrning yakunini tushunish uchun filmning yana 3 daqiqasini ko‘rish yetarli ekanini bildirgandi.
Keyinroq O‘zbekiston Kinematografiya agentligi bosh direktori Firdavs Abduxoliqov xususiy telekanallarda efirga uzatilayotgan milliy seriallar bo‘yicha izoh berdi. Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov Abduxoliqovning izohiga munosabat bildirib, bu kabi masalalarni “uyda kelishib olish” kerakligini kinoya qildi.
“Firdavs Abduxoliqov ‘Sevimli’ kanalida efirga uzatilgan ‘Sabriya’ seriali haqiqatan ham badiiy va mazmunan sayoz, telekanal ta’sischilari va ijodiy jamoasi buni, albatta, inobatga olib, zarur tashkiliy chora-tadbirlarni ko‘rishi darkor deb, munosabat bildiribdi. Shu masalani uyda kelishib olsangiz bo‘lmaydimi? ‘Qalampir.uz’ning yozishicha, ‘Sevimli’ kanali qizingiz va o‘g‘lingizga ham tegishli, seriallarning davlat mablag‘lari evaziga asosiy buyurtmachisi esa o‘zingiz, kinolar sifatiga ham asosiy mas’ul o‘zingiz bo‘lsangiz”, – deb yozgandi Komil Allamjonov.
Shundan so‘ng Kinematografiya agentligi rahbari Firdavs Abduxoliqov atrofidagi manfaatlar to‘qnashuvi yuzasidan tekshiruv tayinlandi. Korrupsiyaga qarshi kurashish agentligi tomonidan Kinematografiya agentligi tomonidan shartnomalar tuzilishida va davlat subsidiyasi mablag‘larining taqsimlanishida manfaatlar to‘qnashuviga yo‘l qo‘yilgani holatlari aniqlangan.
Izoh (0)