Россиядаги ўзбекистонликлар учун эски намунадаги ҳайдовчилик гувоҳномаларини янги намунадаги миллий ҳайдовчилик гувоҳномасига алмаштириб бериш жараёни бошланди, деб хабар бермоқда «Дунё» ахборот агентлиги.
Қайд этилишича, Ўзбекистоннинг Россиядаги элчихонаси консуллик бўлимида, шунингдек, Владивосток, Екатеринбург, Қозон, Новосибирск, Ростов-Дон ва Санкт-Петербургдаги Бош консулхоналарида 25 январдан эътиборан ҳайдовчилик гувоҳномалари янги намунадагисига алмаштириб берилади.
Ўзбекистоннинг Россиядаги элчихонасидан маълум қилинишича, ҳайдовчилик гувоҳномаларини алмаштириш истагида бўлган ватандошлар элчихонанинг консуллик бўлимига ёки юқорида саналган Бош консулхоналарга хорижга чиқиш биометрик паспорти (ID идентификация картаси), миллий ҳайдовчилик гувоҳномаси ва миллий ҳайдовчилик гувоҳномаси талонининг асл нусхаларини тақдим этиши шарт.
Эслатиб ўтамиз, Шавкат Мирзиёев 26 январь куни бўлиб ўтган йиғилишда ҳайдовчилик гувоҳномасини олиш учун ўқитиш тизими тубдан такомиллаштирилишини маълум қилганди. «Коронавирусдан эмас, авариялар оқибатида кўп инсон ҳалок бўлмоқда... Ҳайдовчилик гувоҳномасини ўқимасдан олиш оддий ҳолга айланиб қолди. Шунинг учун, авариялар сони соат сайин ошиб бормоқда. Мен ҳам ўқиганман, биз уч йил ўқиганмиз. Ҳозиргилар ўқимасдан оляпти. Нима Ўзбекистонда қонун йўқми?», — деган Шавкат Мирзиёев.
Ҳукумат қарорига 17 ноябрь куни киритилган ўзгартиришларга кўра, Ўзбекистонда эски ҳайдовчилик гувоҳномасини алмаштириш муддати 1 йилга узайтирилди.
Давлат хизматлари агентлиги ҳайдовчилик гувоҳномасини янгисига алмаштириш хизматини ИИВ ЙҲХББ электрон тизимида техник-профилактик тадбирлар амалга оширилиши муносабати билан 12 ноябрдан бошлаб вақтинча тўхтатган.
Изоҳ (0)