Ўзбекистон ҳудудларида 25 январь куни электр энергия, иссиқлик ва табиий газ таъминотида кузатилган узилиш сабаб иситиш тизими ишламаган кунлар учун тўловлар чегириб ташланади. Бу ҳақда Уй-жой коммунал хизмат кўрсатиш вазирлиги матбуот котиби Жамолиддин Қаландаров хабар қилди.
«Ҳеч қандай хавотирга ўрин йўқ, иситиш тизими ишлатилмаган кунлар учун, албатта, пул чегириб ташланади. Бу Вазирлар Маҳкамасининг 194-сон қарорида ҳам алоҳида кўрсатиб ўтилган», — дейди у,
Қайд этилишича, 26 январь куни Тошкент шаҳридаги барча қозонхоналар фаолияти тикланган. Лекин иссиқлик хонадонларга кириб бормаган. Бу фавқулодда ҳолат билан боғлиқ.
«Чунки газ босимининг кўтарилиши 27 январь эрталабдан бошланди ва меъёрига чиқиш қозонхоналарда ҳам аста-секинлик билан давом этяпти. 27 январь тунга бориб меъёрий босқичга чиқиш имконияти бўлади. Газ босимининг мана шундай кўтарилиб бориши иссиқлик таъминотидаги олдинги ҳолатга қайтишга ёрдам беради», — деган Жамолиддин Қаландаров.
Унинг таъкидлашича, биргина Тошкент шаҳридаги барча қозонхоналарда бир соатда 19 минг метр/кубдан ортиқ сув иситилади ва хонадонларга юборилади.
Ўзбекистонда кузатилган электр энергиясининг йирик носозлиги хронологияси
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тирбандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилганди.Энергетика вазирлиги маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган.
Мавзуга доир: «Тошкентда свет ўчганига ҳайрон қолдим». Пойтахт аҳолиси ва меҳмонлари электр энергиясидаги узилишлар ҳақида (видео)
Энергия танқислиги ортидан Ўзбекистон Афғонистонга электр энергияси етказиб беришни тўхтатди. Газли, Шўртан ҳамда Муборак нефть ва газ қазиб чиқариш бошқармаларидаги 64 та кон фаолиятини вақтинча тўхтатди.
ССВ Зангиота ковид-марказларидаги электр энергияси билан боғлиқ ҳолат юзасидан маълумот берди.
26 январь соат 02:30 га бориб Ўзбекистоннинг 7 та ҳудудида электр таъминоти тўлиқ тиклангани хабар қилинди. Бироқ шу куни соат 18:00 га келиб бундай ҳудудлар сони 4 тагача қисқарди.
Энергетика вазирлиги тизимда юзага келган муаммоларни бартараф этиш учун барча чоралар кўрилаётганини маълум қилганди. Истеъмолчиларга табиий газ етказиб бериш бўйича ишлар ҳам давом эттирилмоқда. 27 январдан бошлаб Ўзбекистоннинг айрим ҳудудларидаги газ заправкалар иши тиклана бошлади.
Қишлоқ хўжалиги вазири ўринбосари Шуҳрат Мирзаевнинг сўзларига кўра, энерготизимдаги носозликлар ортидан қишлоқ хўжалиги маҳсулотларининг нархи кескин ошиб кетмайди.
Изоҳ (0)