Колумбияда ZF-UZ-VAC2001 вакцинасидан фавқулодда фойдаланишга рухсат берилди. Бу ҳақда Инновацион ривожланиш вазирлиги «Дарё»га маълум қилди.
Қайд этилишича, мазкур қарор Anhui Zhifei Longcom Biopharmaceutical Cо Ltd томонидан ишлаб чиқилган вакцинани Жанубий Америкада қўлланилиши COVID-19 пандемиясига қарши глобал ҳамкорлик имкониятини кенгайтиради.
Ҳозиргача мазкур вакцина Ўзбекистон, Хитой ва Индонезияда оммавий эмлаш жараёнида қўлланилмоқда, шунингдек бустер вакцина сифатида фойдаланилмоқда. Ўзбек-хитой вакцинаси Хитой ва Ўзбекистонда ишлаб чиқарилади. Индонезияда ҳам ишлаб чиқариш режалаштирилган бўлиб, вакцинани маҳаллийлаштиришга тайёргарлик кўрилмоқда.
Генотиплаш таҳлили ZF-UZ-VAC2001 вакцинаси коронавируснинг алфа вариантига қарши 92,68 фоиз ва дельта вариантига қарши 81,38 фоиз самарага эгалигини намойиш этган.
Эслатиб ўтамиз, Инновацион ривожланиш вазирлиги маълумотларига кўра, ўзбек-хитой вакцинасининг кучайтирилган дозаси «омикрон»дан деярли 100 фоиз ҳимоя қилади.
2021 йил октябрь ойида Индонезияда ўзбек-хитой вакцинасидан фойдаланишга рухсат берилганди. «Индонезия ОАВларида хабар берилишича, ZF-UZ-VAC2001 вакцинаси COVID-19 вирусига қарши умумий 92,92 фоиз самарадорликни кўрсатган. Индонезияда шу пайтгача Bio Farma, Moderna, Pfizer, AstraZeneca, Sinopharm, up CanSino каби вакциналар қўлланган», — дейилади хабарда.
Изоҳ (0)