Turizm va sport vazirligi huzuridagi Madaniy meros agentligi direktori Shahriyor Nurulloyev 24-yanvar kuni Yaponiya xalqaro hamkorlik agentligi (JICA)ning O‘zbekistondagi vakolatxonasi direktorining birinchi o‘rinbosari Yoshimasa Takemura vakillari bilan uchrashdi. Bu haqda agentlik axborot xizmati xabar qildi.
Qayd etilishicha, uchrashuv belgilangan topshiriqlar ijrosini ta’minlash, xususan, O‘zbekistonda Buyuk Ipak yo‘li madaniy meros arxivlarini saqlash va raqamlashtirish hamda ikki mamlakat o‘rtasida madaniy merosni asrash yo‘nalishida hamkorlik aloqalarini mustahkamlash maqsadida tashkil etilgan.
O‘rganish natijalariga ko‘ra, 2021-yil 29-oktabr kuni Madaniy meros agentligida “Ipak Yo‘li madaniy merosini raqamli arxivlar orqali saqlash” loyihasining dastlabki muhokama yig‘ilishi bo‘lib o‘tgan.
2022-yilning yanvar oyida Madaniy meros agentligida direktor Shahriyor Nurulloyev JICA vakolatxonasi rahbarining birinchi o‘rinbosari Yoshimasa Takemura bilan o‘tkazgan uchrashuvida loyihaga Yaponiya tomonidan 55.9 mln iyena (490 ming AQSh dollari) ajratilgani ma’lum qilingan.
Uchrashuv yakunida tomonlar loyiha hujjatlarini O‘zbekiston va Yaponiya o‘rtasida diplomatik aloqalar o‘rnatilganining 30-yilligiga bag‘ishlangan tadbirlar doirasida imzolash marosimini o‘tkazishga kelishib olgan.
Ma’lumot uchun: JICA tomonidan 2021-yilning 10—30-iyun kunlari O‘zbekiston tarixi davlat muzeyi hamda Termiz arxeologiya muzeylarida va Termiz shahri yaqinidagi arxeologik obyektlarda o‘rganish ishlari olib borilgan.
Mavzuga doir:
Izoh (0)