«Қўриқчилар ҳаётингни қутқариб қололмайди. Лўли, сен учун барчаси тугади!». «Фиорентина» мухлислари Душан Влаҳовичга таҳдид қилмоқда

«Фиорентина» мухлислари Душан Влаҳовичнинг «Ювентус»га ўтиши ҳақидаги хабардан сўнг унга таҳдид қила бошлади.

Ярим тунда «Фиорентина» уй ўйинларини ўтказадиган «Артемио Франки» стадиони атрофида бир қанча ҳақоратловчи баннерлар пайдо бўлди.

Унда: «Ҳурмат голлар билан қозонилмайди. Влаҳович — жирканч горбун (букур — ‘Ювентус’ футболчилари ва мухлисларининг лақаби)», «Қўриқчиларинг ҳаётингни қутқариб қололмайди. Лўли, сен учун ҳаммаси тугади!», «Тез орада кўришамиз, ёмон бола», «Влаҳович — эсипаст», «Влаҳович — эсипаст лўли» каби жумлалар ёзилган эди.

Шундан сўнг полиция Влаҳовичнинг уйи олдида тезкор кузатувни йўлга қўйди ва у истиқомат қиладиган уй мунтазам равишда назорат қилинмоқда. Хабарга кўра, футболчи шикоят қилмаган, полициянинг ўзи шахсий ташаббуси билан бу ишга қўл урган.

Аввалроқ Душан Влаҳовичнинг «Ювентус»га ўтиши мумкинлиги, футболчи аллақачон Турин клуби билан шахсий келишувга эришганлиги хабар қилинган эди.