Ака-ука Кличколар ҳақида гўё ҳамма нарса маълумдек туюлади: иккаласи ҳам оғир вазн тоифасида собиқ жаҳон чемпиони ва фаолиятини якунлаганидан кейин ҳам ўзини бошқа соҳаларда топиб олган ринг афсоналари. Владимир истиқболли тадбиркор ва меценат. Виталий эса ўзини сиёсатга бағишлаган, ҳозирда у Киев мэри ҳисобланади.
Аммо Кличколар оиласининг ҳикоясини ҳақиқий триллер деб аташ мумкин.
Кличколар бувисининг 7 ёшли ўғли фашистлар томонидан отиб ўлдирилган
Кличконинг аждодлари украин казаклари бўлган. Кличко фамилиясининг маъноси украин тилидан таржима қилинганда «чақириш» маъносини билдиради. Оиланинг илдизлари камбағал украин деҳқонларига бориб тақалади. Оиланинг илк таниқли вакили Кличколарнинг бобоси бўлади — Родион Петрович, у Смела шаҳрида полициячи бўлиб ишлаган. Родион шу ерда рафиқаси Тамара Эфимовна Этилзонни учратган.1934 йилда жуфтлик ўғил фарзандли бўлади, унга Владимир деб исм қўйилади. 1938 йилнинг ёзида Кличко хизмат қилиш учун Переславлга, кейин эса Волинга юборилади. Иккинчи жаҳон уруши олдидан Родион Днепропетровскдаги ҳарбий қисмга қўшилади, рафиқаси ва ўғли эса Смелага жўнаб кетади. Айнан ўша ерда улар уруш чангалига тушиб қолади.
1941 йилнинг августига келиб, фашистлар шаҳарни эгаллаб олади ва биринчи навбатда барча яҳудийларни, жумладан Тамара Эфимовна ва унинг ўғлини ҳам махсус жойларга олиб кетади. Болалар ва катталар алоҳида-алоҳида олиб кетилади. Деярли барча смелалик яҳудийлар ва ҳарбий асирлар билан бирга 7 ёшли Владимир Родионович Кличко ҳам отиб ташланади.
Боксчиларнинг бувиси мўъжизавий тарзда омон қолишнинг уддасидан чиқади: кенг тарқалган талқинга кўра, аёлни эрининг қариндошлари қишлоқларнинг бирига яширган. Бу вақтга келиб Родион Кличко Смелага қайтган эди.
Фашистлар у ерда деярли кўринмаган, аммо ҳудуд полиция назорати остига олинганди. Бир йилдан кўпроқ вақт давомида Тамара чердакда яшайди ва фақат тундагина ташқарига чиқади. Агар фашистлар аёлни топиб олганида, нафақат уни, балки унга бошпана берган оилани ҳам отиб ташларди. 1944 йилда, Смела фашистлардан озод қилингандан сўнг Кличко полицияга қайта тикланади: у вилоят жиноят қидирув бошқармаси бўлимининг тезкор ходими сифатида ишлайди. Аммо кўп ўтмай у Қрим татарларини Қозоғистонга депортация қилишга раҳбарлик қилиш учун юборилади.
Виталий Кличкога Рим гладиатори шарафига Спартак деб исм қўймоқчи бўлишган
Бокс афсоналарининг отаси Қозоғистонда туғилади, унга фашистлар томонидан отиб ташланган (биринчи) Владимир хотирасига Владимир деб исм қўйилади. Шунингдек, ака-укаларнинг холалари — Раиса ва Анна ҳам ўша ерда туғилган.Владимир Родионович Кличко муваффақиятли ҳарбий карьера қилади: у учувчилар ўқув юртини тамомлаб, Чехословакия, Қирғизистон, Қозоғистон ва Болтиқбўйи давлатларида хизмат қилади. Боксчиларнинг онаси Надежда Булино эса бошланғич синф ўқитувчиси бўлиб ишлаган. Кличколар бувисининг она томондан қариндошларининг деярли барчаси оммавий очарчилик вақтида ўлиб кетади.
Владимир Родионович генерал майор унвонигача кўтарилган, Украинанинг Германиядаги ҳарбий дипломатик вакили (шу ерда ака-укалар боксда ном қозонган) бўлиб ишлайди, шунингдек, у НАТОда фаолият юритган. Тўнғич фарзанд Виталий 1971- йилда Қирғизистонда, кенжа Владимир эса 1976- йилда Қозоғистонда туғилган.
Виталий 2006 йилда отаси унга Виталий эмас, балки Рим гладиатори шарафига Спартак исмини қўймоқчи эканлигини айтганди. Аммо бу қарор онасига ёқмаган. Шундан сўнг масала оригинал тарзда ҳал қилинади.
«Отам биринчи ташриф буюрга одамдан: ‘Менга бирорта эркаклар исмини айтинг’, деб сўраган. Шунда у одам ‘Виталий’, деб жавоб берган. Шу тарзда масала ҳал этилган», — деб эслаганди Кличко.
1985 йилда Кличколар оиласи Киевга қайтиб келади.
Ўтган асрнинг 90 йилларида ака-ука Кличколар Украина мафиясига ўралашиб қолганди
Виталий ва Владимир ҳар доим ажойиб жисмоний имкониятларга эга бўлган. Виталий кикбоксинг билан шуғулланиб, олти марта жаҳон чемпиони бўлган. Аммо 90 йилларнинг бошларида у боксга ўтади ва ҳатто СССР халқлари Спартакиадасининг совриндори бўлишга муваффақ бўлади (бронза) — 1991 йил сентябрь ойида мамлакат парчаланиши олдидан.Бу вақтга келиб, Владимир ҳам ўзини спортда синаб кўраётганди. У 14 ёшида Броварский мактаб-интернатига ўқишга киради. 1993 йилда у ўсмирлар ўртасидаги Европа чемпионатида ғолиб бўлади, бир йилдан сўнг эса Жаҳон чемпионатида кумуш медалини қўлга киритади.
Ўша пайтга келиб, ака-укаларнинг ҳаётида ҳарбий фарзанди, Рибка лақабли криминал авторитет Виктор Рибалко пайдо бўлади. 1994 йилда Уюшган жиноятчиликка қарши кураш қўмитасида ишлаган Украинанинг собиқ бош вазири Николай Азаров бу ҳақда шундай ёдга олганди:
«1999 йилгача Киев турли жиноий авторитетларнинг таъсири тармоғига бўлинган эди. Рибка, Череп, Кисел… Хўш, Кличко ким бўлган? Майли, у мени судга берсин, лекин ҳақиқатни айтаман. Виталий Кличко Рибканинг кичик бир қўриқчиси эди. Кличко тумшуққа туширишни жуда яхши биларди. У ҳар доим криминал олам диққат марказида бўлган кикбоксинг билан шуғулланган. Рибканинг яқин шериклари, йирик тадбиркорлар ва айни пайтда уюшган жиноий гуруҳлар раҳбарлари унга эътибор қаратади. Рибка Кличкони ‘кўтариш’ учун 200 минг доллар ажратади. Шу тариқа Кличконинг Германиядаги фаолияти бошланган».
Владимир Кличконинг Атланта Олимпиадасидаги ғалабасидан кейин ака-укаларнинг Рибка билан бирга Нью-Йорк бўйлаб сайр қилаётгани тасвирланган видео ҳам бор. Улар ўша пайтдаги энг кучли промоутер Дон Кингнинг уйига ҳам ташриф буюрган. Аммо украиналик боксчилар Кинг билан шартнома бўйича келиша олмайди, охир-оқибат улар деярли ўн йил давомида бирга ишлаган немис промоутери Клаус-Питер Кол билан келишувга эришади.
Манбаларнинг таъкидлашича, Рибалко ака-укаларнинг ринг ва унинг ташқарисидаги даромадларидан фоиз олиб турган. 2005 йилда жиноятчи Киевда отиб ташланади, айнан шу вақтдан бошлаб Владимир ва Виталий Кол билан ҳамкорликни тўхтади.
Ака-ука Кличколарнинг кейинги ажойиб фаолиятини эса барча жуда яхши билади.
Изоҳ (0)