Ўзбекистонда хизмат кўрсатган санъат арбоби, профессор, театр режиссёри, педагог Жўра Маҳмудов вафот этди. Бу ҳақда Маданият вазирлиги матбуот хизмати хабар берди.
Маълумот учун, Жўра Маҳмудов 1942 йил Тошкент шаҳрида туғилган, Тошкент театр ва рассомлик санъати институтини тугатган. 1971—1975 йилларда Ўш, 1975—1978 йилларда Самарқанд, 1983—1994 йилларда Сирдарё театрларида бош режиссёр, 1978—1983 йилларда телевидениеда, 1994—1997 йилларда Маданият ишлари вазирлигида етакчи мутахассис, 1997—2002 йилларда Ёш томошабинлар театрида режиссёр бўлиб ишлаган.
У фаолияти давомида «Она», «Қиёмат қарз», «Инсонликка номзод», «Оғриқ тишлар», «Сохта оқсуяк», «Қаердасан, жон болам», «Қирол Лир» ва бошқа спектаклларни саҳналаштирган. Ҳар бир спектаклнинг бадиий-ғоявий юксаклиги, таъсир кучини оширишда тасвирий мусиқий, техник воситалардан унумли фойдаланган.
Жўра Маҳмудов «Адолат куни», «Овсинлар», «Садоқат» каби саҳна асарлари, «Осмондан танга ёққан кун», «Томчи», «Алпомиш», «Иккивой ва Бешвой» каби кичик томошабинларга бағишланган эртак-песалар ҳам ёзган.
Аввалроқ академик Бахтиёр Назаров 77 ёшда, дубляж устаси Санжар Саъдуллаев 67 ёшда, Ўзбекистон халқ артисти Бахтиёр Ихтиёров 81 ёшда вафот этгани тўғрисида хабар берилганди.
Изоҳ (0)