O‘zbekistonda xizmat ko‘rsatgan san’at arbobi, professor, teatr rejissori, pedagog Jo‘ra Mahmudov vafot etdi. Bu haqda Madaniyat vazirligi matbuot xizmati xabar berdi.
Ma’lumot uchun, Jo‘ra Mahmudov 1942-yil Toshkent shahrida tug‘ilgan, Toshkent teatr va rassomlik san’ati institutini tugatgan. 1971—1975-yillarda O‘sh, 1975—1978-yillarda Samarqand, 1983—1994-yillarda Sirdaryo teatrlarida bosh rejissor, 1978—1983-yillarda televideniyeda, 1994—1997 yillarda Madaniyat ishlari vazirligida yetakchi mutaxassis, 1997—2002-yillarda Yosh tomoshabinlar teatrida rejissor bo‘lib ishlagan.
U faoliyati davomida “Ona”, “Qiyomat qarz”, “Insonlikka nomzod”, “Og‘riq tishlar”, “Soxta oqsuyak”, “Qayerdasan, jon bolam”, “Qirol Lir” va boshqa spektakllarni sahnalashtirgan. Har bir spektaklning badiiy-g‘oyaviy yuksakligi, ta’sir kuchini oshirishda tasviriy musiqiy, texnik vositalardan unumli foydalangan.
Jo‘ra Mahmudov “Adolat kuni”, “Ovsinlar”, “Sadoqat” kabi sahna asarlari, “Osmondan tanga yoqqan kun”, “Tomchi”, “Alpomish”, “Ikkivoy va Beshvoy” kabi kichik tomoshabinlarga bag‘ishlangan ertak-pyesalar ham yozgan.
Avvalroq akademik Baxtiyor Nazarov 77 yoshda, dublyaj ustasi Sanjar Sa’dullayev 67 yoshda, O‘zbekiston xalq artisti Baxtiyor Ixtiyorov 81 yoshda vafot etgani to‘g‘risida xabar berilgandi.
Izoh (0)