Наманган вилояти ҳокими Шавкат Абдураззоқов Чуст туманидаги маданият саройида бўлиб ўтган маҳаллалардаги ёшлар етакчилари билан учрашувга Чуст дўпписини кийиб келди. Бу ҳақда «Дарё» мухбири Азизбек Абдувалиев хабар бермоқда.
Тадбирдан аввал мазкур Маданият саройида тадбиркор ва ҳунармандларнинг маҳсулотлари ярмаркаси бўлиб ўтган. Ярмаркада «Чуст дўппилари» корхонаси раҳбари Нурхон Бойбоева томонидан ташкил этилган кўргазма ҳам намойиш этилди.
Нурхон опа ярмаркани кўздан кечираётган вилоят ҳокимига дўппи кийгизиб қўйди.
«Шундай қиламан деган ниятим бор эди. У кишига бинойидек ярашди. Ечмасдан, тўғри тадбирга кийиб кириб кетди. Бироздан кейин ёрдамчилари келиб, ‘бошқа дўппиларни ҳам беринг, иштирокчиларга тарқатамиз‘, деди. Бирпасда кўргазмага олиб келинган 50 та Чуст дўпписи қўлма-қўл бўлиб кетди», — дейди Бойбоева.
Тадбирда вилоят ҳокими Поп, Чуст ва Тўрақўрғон туманлари маҳаллаларидаги янги тайинланган ёшлар етакчилари билан учрашди. Президентнинг «Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида»ги қарори мазмун-моҳияти ва амалга ошириш механизмлари муҳокама қилинди.
Изоҳ (0)