Андижонда ўз вазифасини бажариш учун 4 минг доллар пора сўраган МИБ ходимлари ушлангани тўғрисида хабар берилганди. Мазкур ҳолат сабаб Мажбурий ижро бюросининг Андижон шаҳар ва Андижон туман бўлим бошлиқлари лавозимларидан озод қилинган. Бу ҳақда бюро матбуот хизмати «Дарё»га маълум қилди.
14 январь куни бюронинг Андижон шаҳар бўлими давлат ижрочиси Ф.Ф. ва Андижон туман бўлими давлат ижрочиси И.Қ.нинг фуқаро О.Қ.дан 4 минг доллар олган вақтида ашёвий далиллар билан жиноят устида ушланган. Ҳозирда уларга нисбатан ҳозирда жиноят иши доирасида тергов ҳаракатлари олиб борилмоқда.
Таъкидланишича, қўл остидаги ходимлар устидан етарли назорат ўрнатмай, масъулиятсизликка йўл қўйиб, ходимлар томонидан коррупция ва бошқа суиистеъмолчиликлар содир этилишининг олдини олиш чораларини кўрмагани учун бюронинг Андижон шаҳар бўлими бошлиғи Ш.У. ҳамда Андижон туман бўлими бошлиғи А.Б. ўз лавозимларидан озод қилинган.
Маълумот учун, ўтган даврда МИБ Шахсий хавфсизлик тармоқларининг хизмат текширувлари натижаларига кўра, қўпол қонунбузилишига йўл қўйган 69 нафар ходим интизомий жазо тариқасида бюро органларидан бўшатилган. Шунингдек, бюронинг 24 нафар ходими томонидан содир этилган жиноят ҳолатларининг 18 таси шахсий хавфсизлик тармоқ ходимларининг ташаббуслари асосида фош этилган.
Аввалроқ Бухорода қарзни ундиришга келган МИБ ходимини калтаклаган корхона раҳбари жавобгарликка тортилгани, ходимларини ҳақорат қилган Ангрен МИБ бошлиғи ҳайфсан олгани тўғрисида хабар берилганди.
Изоҳ (0)