Баҳодир Абдувалиев Юнусобод тумани ҳокими этиб тайинланди. Бу ҳақда Тошкент шаҳар ҳокимлиги матбуот хизмати хабар берди.
Маълумот учун, Баҳодир Абдувалиев 1968 йил 27 августда Тошкент шаҳрида туғилган. Маълумоти олий. 1992 йилда Тошкент давлат университетини (ҳозирги ЎзМУ), 1995 йилда Тошкент давлат юридик институтини тамомлаган. 1992 йилдан ҳозирга қадар ҳуқуқ-тартибот идораларида турли лавозимларда ишлаган.
Баҳодир Абдувалиев 2019 йилдан буён Тошкент шаҳар прокурорининг ўринбосари лавозимида фаолият юритиб келаётганди.
Таъкидлаш керакки, 2021 йилнинг январь ойидан бери Юнусобод тумани ҳокими лавозимида Жаҳонгир Иброҳимов ишлаб келаётган эди. Президент Шавкат Мирзиёев 2021 йил 15 январь куни Тошкент шаҳри ва Юнусобод тумани фаоллари билан учрашувда туманнинг янги ҳокими Иброҳимов ҳақида ҳам тўхталиб ўтганди. Ўшанда давлат раҳбари Иброҳимовнинг Юнусобод туманига «янги куч» сифатида келганини таъкидлаб, туманда катта ишларни қилиши ёки ишончли оқламаслигини айтган.
«Мен Иброҳимовга ё Юнусободда катта ишларни қиласан ёки ишончни оқламайсан, деган масала қўйдим. Шунинг учун у ъраскладушкаъ билан келди туманга. У ъраскладушкаъни олиб ҳокимиятда ётмайди, сектор маҳалласида жамоаси билан бориб ётади. Агар унга маҳалланинг ъҳиди’ ёқмаса, кетади. Менга маҳалланинг ъҳиди’ ёқади. Маҳалланинг ъҳиди’ бу — халқнинг овози. Ана шундай ишласа, худо хоҳласа, режаларимиз, кўзлаган мақсадларимиз жой-жойига тушиб, амалга ошади, Юнусобод янада кўркамлашиб, ривожланади», — деган эди Шавкат Мирзиёев.
Эслатиб ўтамиз, 2021 йилнинг сентябрида пойтахт ҳокими Жаҳонгир Ортиқхўжаев Меҳнат кодексининг 181-моддасига асосан Мирзо Улуғбек тумани ҳокими Шавкатбек Иргашевга, Юнусобод тумани ҳокими Жаҳонгир Иброҳимовга ва Янгиҳаёт тумани ҳокими Ҳаёт Иноғомовга нисбатан ҳайфсан берганди.
Изоҳ (0)