Британия Ташқи ишлар вазирлигининг даъво қилишича, Кремль Украинада ҳокимиятга Россияга содиқ раҳбарни олиб келиш режасини ишлаб чиқмоқда. Бу ҳақда Meduza хабар берди.
«Биз Россия ҳукумати Киевда россияпараст раҳбарни ҳокимиятга келтиришни режалаштираётгани, шу билан бирга Украинага ҳужум қилиш ва уни босиб олиш масаласини кўриб чиқаётгани ҳақида маълумот олдик», — дейилади вазирлик сайтида.
Британия дипломатларига кўра, ушбу лавозимга потенциал номзод сифатида Олий Раданинг собиқ депутати Евгений Мураев кўрилмоқда.
Россия разведкаси шунингдек, бир қатор украиналик сиёсатчилар, хусусан, Украина собиқ бош вазирларининг биринчи ўринбосарлари Сергей Арбузов ва Андрей Клюев, Миллий хавфсизлик ва мудофаа кенгаши котибининг собиқ ўринбосари Владимир Сивкович ва собиқ бош вазир Николай Азаров кабилар билан алоқада, дейилади Лондон баёнотида.
Шундан келиб чиқиб, Британия ташқи ишлар вазири Лиз Трасс Москвани кескинликни пасайтиришга, «тажовузкорлик ва нотўғри ахборот кампаниясини» тўхтатишга ҳамда дипломатия йўлидан боришга чақирди.
Россия Ташқи ишлар вазирлиги британиялик ҳамкасбларининг баёнотига жавобан Лондондан «провокацион ҳаракатларни, бемаъни гаплар тарқатишни бас қилишни ва диққатини татар-мўғул истилоси тарихини ўрганишга қаратишни» сўради.
Евгений Мураевнинг ўзи «Strana.ua» сайтига берган изоҳида шундай деган:
Медведчук билан зиддият туфайли 2018 йилдан бери Россия санкциялари остидаман. У ерда оиламнинг мол-мулки хатловга олинган. Буни Британия разведка хизматлари ва Ташқи ишлар вазирлиги Россия гўёки мени «оккупацион ҳукумат» раҳбари этиб тайинламоқчилиги билан қандай уйғунлаштирмоқда — мендаги савол шу.
Изоҳ (0)