Москвада The Infraud Organization хакерлар гуруҳининг асосчиси деб ҳисобланадиган шахс ҳибсга олинди. АҚШда ушбу гуруҳ ярим миллиард долларни ўмаришда айбланмоқда

Москва суди The Infraud Organization хакерлар гуруҳининг асосчиси деб ҳисобланган Андрей Новакни ҳибсга олди. АҚШда у киберфирибгарликда айбланиб қидирувда эди, деб ёзади «ТАСС».

Хакерликда гумон қилинган яна уч киши уй қамоғига олинди. Агентлик манбасининг қайд этишича, Россия махсус хизматлари жиноятчиларни АҚШ ҳуқуқ-тартибот идоралари кўмагида топган.

Ишда айбланувчилар компьютер маълумотларига ноқонуний кириш ва тўлов воситаларини ноқонуний айлантириш моддалари билан айбланмоқда.

Яна бир манбанинг «ТАСС» агентлигининг айтишича, Россия Новакни АҚШга экстрадиция қилмоқчи эмас. «Россия қонунчилиги ўз фуқароларини хорижий давлатга экстрадиция қилишни тақиқлайди», — деди манба. Шу билан бирга, унинг сўзларига кўра, агар ҳибсга олинган гуруҳ аъзолари орасида Россия фуқаролигига эга бўлмаган айбланувчи бўлса, «Россияда жиноят иши тергов қилиниб, судда кўриб чиқилгач, судланувчи унга нисбатан иш очилган давлатга экстрадиция қилинади».

2021 йил март ойида АҚШ бир неча йил аввал Таиландда ҳибсга олинган 33 ёшли россиялик Сергей Медведевни ўн йиллик қамоқ жазосига ҳукм қилди. АҚШ ҳукуматига кўра, у ҳам The Infraud Organization асосчиларидан бири бўлган; суд жараёни давомида Медведев ўз айбига иқрор бўлди.

Эслатиб ўтамиз, 14 январга ўтар кечаси Украина ҳукумати веб-сайтларига кенг кўламли хакерлар ҳужуми уюштирилди. Украина хавфсизлик хизмати маълумотларига кўра, жами 70 га яқин веб-сайтлар, жумладан, Украина Ташқи ишлар вазирлиги ва Таълим вазирлиги манбалари ҳам ҳужумга учраган. Украина Рақамли трансформация вазирлиги киберҳужумга Россиянинг алоқадорлиги ҳақида далиллар борлигини маълум қилди.

Украина ҳукумати сайтларига қилинган ҳужумлардан сўнг, Европа Иттифоқи мамлакатлари 15 январь куни киберҳужумларга қарши кураш бўйича олти ҳафталик машғулотларни бошлади.