Britaniya Tashqi ishlar vazirligining da’vo qilishicha, Kreml Ukrainada hokimiyatga Rossiyaga sodiq rahbarni olib kelish rejasini ishlab chiqmoqda. Bu haqda Meduza xabar berdi.
“Biz Rossiya hukumati Kiyevda rossiyaparast rahbarni hokimiyatga keltirishni rejalashtirayotgani, shu bilan birga Ukrainaga hujum qilish va uni bosib olish masalasini ko‘rib chiqayotgani haqida ma’lumot oldik”, — deyiladi vazirlik saytida.
Britaniya diplomatlariga ko‘ra, ushbu lavozimga potensial nomzod sifatida Oliy Radaning sobiq deputati Yevgeniy Murayev ko‘rilmoqda.
Rossiya razvedkasi shuningdek, bir qator ukrainalik siyosatchilar, xususan, Ukraina sobiq bosh vazirlarining birinchi o‘rinbosarlari Sergey Arbuzov va Andrey Klyuev, Milliy xavfsizlik va mudofaa kengashi kotibining sobiq o‘rinbosari Vladimir Sivkovich va sobiq bosh vazir Nikolay Azarov kabilar bilan aloqada, deyiladi London bayonotida.
Shundan kelib chiqib, Britaniya tashqi ishlar vaziri Liz Trass Moskvani keskinlikni pasaytirishga, “tajovuzkorlik va noto‘g‘ri axborot kampaniyasini” to‘xtatishga hamda diplomatiya yo‘lidan borishga chaqirdi.
Rossiya Tashqi ishlar vazirligi britaniyalik hamkasblarining bayonotiga javoban Londondan “provokatsion harakatlarni, bema’ni gaplar tarqatishni bas qilishni va diqqatini tatar-mo‘g‘ul istilosi tarixini o‘rganishga qaratishni” so‘radi.
Yevgeniy Murayevning o‘zi “Strana.ua” saytiga bergan izohida shunday degan:
Medvedchuk bilan ziddiyat tufayli 2018-yildan beri Rossiya sanksiyalari ostidaman. U yerda oilamning mol-mulki xatlovga olingan. Buni Britaniya razvedka xizmatlari va Tashqi ishlar vazirligi Rossiya go‘yoki meni “okkupatsion hukumat” rahbari etib tayinlamoqchiligi bilan qanday uyg‘unlashtirmoqda — mendagi savol shu.
Izoh (0)