IShID a’zolari Suriyaning Xaseke viloyatidagi qamoqxonaga hujum uyushtirib, u yerda hibsda saqlanayotgan jangarilarni ozod etishga urindi. Bu haqda “Suriya demokratik kuchlari” (SDK) kurd jangari otryadlarining bayonotiga tayanib, Reuters xabar berdi. Shuningdek, qamoqxonaga uyushtirilgan hujum haqida Suriyaning SANA davlat agentligi ham yozgan.
Uning ma’lumotlariga ko‘ra, portlovchi qurilmalar o‘rnatilgan ikkita mashina IShID tarafdorlari bo‘lgan jangarilar saqlanayotgan qamoqxona darvozasi oldida portlagan. Shundan so‘ng, hujum uyushtirganlar va qamoqxona qo‘riqchilari o‘rtasida otishga yuzaga kelgan. Guvohlarning aytishicha, ushbu shaxslar portlashlar yordamida devorda teshik ochib, mahbuslarning qochib ketishga yordam bermoqchi bo‘lgan.
SKD vakillarining ma’lum qilinishicha, hujum qaytarilgan va mahbuslarning qochib ketishiga yo‘l qo‘yilmagan.
Reuters’ning yozishicha, tasdiqlanmagan ma’lumotlarga ko‘ra, bir necha mahbus o‘ldirilgan. Hujumga uchragan qamoqxonada qancha mahkum borligi to‘g‘risida ma’lumot yo‘q.
IShID jangarilari Suriyada bosqinchilik harakatlarini davom ettirmoqda, xususan, suriyalik harbiy xizmatchilarga hujumlar uyushtirilmoqda. Yanvar boshida mamlakat janubida sodir bo‘lgan hujum oqibatida besh nafar harbiy halok bo‘lgan, yana 20 nafari jarohat olgandi. SANA agentligining yozishicha, terrorchilar ichida harbiy xizmatchilar bo‘lgan avtobusni o‘qqa tutgan.
Avvalroq AQSh IShIDning Afg‘onistondagi bo‘linmasiga aloqador afg‘onlarga qarshi sanksiyalar e’lon qilgani, “Tolibon” Qandahorda IShIDning 3 nafar jangarisini yo‘q qilgani, Iroqda IShID yetakchilaridan biri o‘ldirilgani to‘g‘risida xabar berilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)