Тошкентнинг Юнусобод туманида тез ёрдам машинаси йўллар ёмонлиги сабаб бемор боланинг олдига бора олмади. Икки ҳафта ичида бу ерга тўртта тез ёрдам машинаси тиқилиб қолган. Бу ҳақда пойтахт тез ёрдам хизмати фелдшери Злата Гафурова ўзининг Facebook’даги саҳифасига ёзиб қолдирган.
Унинг сўзларига кўра, айни кунларда тез ёрдам ходимлари тиним билмай, баъзи ҳолларда нонушта, тушлик ва тўйиб ухламасдан ишламоқда. Аммо уларнинг қаршисидан тез-тез ўтиб бўлмас тўсиқлар — абгор йўллар чиқмоқда.
«Юнусобод туманининг «Лайлакобод» маҳалласида ҳайвонот боғи қаршисида содир бўлган ҳолатни жуда кўрсатгим келди. Бу тез ёрдамни кутаётган одамларга машина юборишнинг имкони йўқ бўлган вазият. Икки ҳафта давомида у ерга тўртта машина тиқилиб қолди, ёрдам чақирилди. Кеча шифокор қарийб 800 метрни чамадони ва енгил кийимда, ёмғирда босиб ўтди. Тиббиёт ходимлари ечиш осон бўладиган енгил оёқ кийимда юради, бу одатда крокслар, шиппак ёки кроссовкалар бўлади», — деб ёзади у.
Фелдшернинг ёзишича, ўша куни тез ёрдам машинаси чақириқ бўйича 1 ёшга тўлган болани кўриш учун кетаётган бўлган. Ота-онанинг машинаси бўлмагани сабаб улар тиббиёт ходимлари қаршисига чиқа олмаган. Натижада машина тиқилиб қолгач, шифокор беморни қутқариш учун ёмғирда лой босиб юришга мажбур бўлган.
«Мана қор ёғган кеча, ҳайдовчи ва шифокор тиқилиб қолган машина ичида ухлашган. Тушлик, кечки овқат, ҳожатхонасиз — яна пиёда юриш керак? Буниси энди ортиқча», — дея таъкидлайди Злата.
Эслатиб ўтамиз, 2021 йилнинг февраль ойида Абдулла Азизов Ўзбекистонда тез тиббий ёрдамнинг бир марталик ташрифи ўртача 150 минг сўмга тушиши ҳақида айтган эди. Май ойида эса Республика шошилинч тез тиббий ёрдами илмий маркази бош директори Даврон Тўлаганов 2021 йилда битта тез тиббий ёрдам чақириғи учун 7700 сўмдан маблағ ажратилганини таъкидлаганди.
Изоҳ (0)