Toshkentning Yunusobod tumanida tez yordam mashinasi yo‘llar yomonligi sabab bemor bolaning oldiga bora olmadi. Ikki hafta ichida bu yerga to‘rtta tez yordam mashinasi tiqilib qolgan. Bu haqda poytaxt tez yordam xizmati feldsheri Zlata Gafurova o‘zining Facebook’dagi sahifasiga yozib qoldirgan.
Uning so‘zlariga ko‘ra, ayni kunlarda tez yordam xodimlari tinim bilmay, ba’zi hollarda nonushta qilmay, tushlik va to‘yib uxlamasdan ishlamoqda. Ammo ularning qarshisidan tez-tez o‘tib bo‘lmas to‘siqlar — abgor yo‘llar chiqmoqda.
“Yunusobod tumanining “Laylakobod” mahallasida hayvonot bog‘i qarshisida sodir bo‘lgan holatni juda ko‘rsatgim keldi. Bu tez yordamni kutayotgan odamlarga mashina yuborishning imkoni yo‘q bo‘lgan vaziyat. Ikki hafta davomida u yerga to‘rtta mashina tiqilib qoldi, yordam chaqirildi. Kecha shifokor qariyb 800 metrni chamadoni va yengil kiyimda, yomg‘irda bosib o‘tdi. Tibbiyot xodimlari yechish oson bo‘ladigan yengil oyoq kiyimda yuradi, bu odatda krokslar, shippak yoki krossovkalar bo‘ladi”, — deb yozadi u.
Feldsherning yozishicha, o‘sha kuni tez yordam mashinasi chaqiriq bo‘yicha 1 yoshga to‘lgan bolani ko‘rish uchun ketayotgan bo‘lgan. Ota-onaning mashinasi bo‘lmagani sabab ular tibbiyot xodimlari qarshisiga chiqa olmagan. Natijada mashina tiqilib qolgach, shifokor bemorni qutqarish uchun yomg‘irda loy bosib yurishga majbur bo‘lgan.
“Mana qor yog‘gan kecha, haydovchi va shifokor tiqilib qolgan mashina ichida uxlashgan. Tushlik, kechki ovqat, hojatxonasiz — yana piyoda yurish kerak? Bunisi endi ortiqcha”, — deya ta’kidlaydi Zlata.
Eslatib o‘tamiz, 2021-yilning fevral oyida Abdulla Azizov O‘zbekistonda tez tibbiy yordamning bir martalik tashrifi o‘rtacha 150 ming so‘mga tushishi haqida aytgan edi. May oyida esa Respublika shoshilinch tez tibbiy yordami ilmiy markazi bosh direktori Davron To‘laganov 2021-yilda bitta tez tibbiy yordam chaqirig‘i uchun 7700 so‘mdan mablag‘ ajratilganini ta’kidlagandi.
Izoh (0)