O‘zbekistonda o‘tgan 11 oy davomida tez yordam xizmatiga 6,3 mingdan ziyon yolg‘on chaqiriq kelib tushgan

O‘zbekistonda 2021-yilning 1-yanvaridan 1-dekabriga qadar tez yordam xizmatiga mamlakat bo‘yicha jami 6301 ta yolg‘on chaqiriq kelib tushgan. Bu haqda SSV matbuot xizmati xabar berdi.

Ta’kidlanishicha, bu 2020-yilning shu davriga qiyoslaganda qariyb 1800 ta kam. “Yolg‘on chaqiriqlar haqiqiy bemorlar hayotini xavf ostiga qo‘yishini inobatga olsak, uning bittasi ham davlat va xalq uchun katta ziyon keltirishiga shubha yo‘q”, — deyiladi xabarda.

Tahlillar natijasiga ko‘ra, eng ko‘p yolg‘on chaqiriqlar kelib tushgan hududlar ro‘yxati boshida 1317 ta ko‘rsatkich bilan Toshkent viloyati turibdi. Keyingi o‘rinni Farg‘ona viloyati egallagan – 942 ta yolg‘on chaqiriq.

Shuningdek, tez yordam xizmatiga Toshkent shahridan 894 ta, Qashqadaryodan 874 ta hamda Navoiy viloyatidan 842 ta yolg‘on chaqiriq kelib tushgan.

Vazirlik matbuot xizmatining qayd etishicha, tez tibbiy yordam xodimlari bemorni davolamaydi, balki yuzaga kelgan holat bo‘yicha shoshilinch va tez tibbiy yordam ko‘rsatadi, ya’ni faqat simptomatik davo choralarini ko‘radi.

“Qolaversa, yolg‘on chaqiriqlar tez tibbiy yordam xodimlariga ikki barobar ko‘p tashvish keltiradi. Ya’ni qilingan murojaatning haqiqatan ham yolg‘on ekanini isbotlash zarur. Buning uchun chaqiriqda ko‘rsatilgan manzilni aniqlash, kunning qaysi vaqti bo‘lishidan qat’i nazar, surishtiruv o‘tkazish va shundan so‘ng uni hujjatlashtirish kerak. Bu esa, tabiiyki, tez yordam xizmatiga muhtoj bemorlarning kutib qolishi, hatto hayoti xavf ostida qolishiga sabab bo‘lishi mumkin”, — deyiladi xabarda.

Avvalroq Toshkent shahar tez yordam xizmatiga bir kunda bolalar bo‘yicha o‘rtacha 1,5 mingga yaqin chaqiriq kelib tushayotgani ma’lum bo‘lgandi. 1—18-noyabr kunlari bolalar bo‘yicha 20 mingdan ziyod chaqiriq kelib tushgan.