Ўзбекистон йўлларида содир бўлган йўл-транспорт ҳодисалари тафсилотларини тақдим этамиз.
Хоразмда «Нива» каналга тушиб кетди
19 январь куни Хоразм вилояти Урганч туманида яшовчи фуқаро вилоят Фавқулодда вазиятлар бошқармасининг 1050 қисқа рақамига мурожаат қилиб, ноқулай об-ҳаво шароити туфайли «Нива» ҳайдовчиси бошқарувни йўқотиш оқибатида Урганч тумани «Чолиш» қишлоқ фуқаролар йиғини ҳудудидан ўтган каналга тушиб кетганини айтиб, амалий ёрдам беришни сўраган.
Шунга кўра, бошқарма ёнғин-қутқарув отряди қутқарувчилари зудлик билан айтилган манзилга етиб бориб, махсус асбоб-анжомлар ва техника ёрдамида автомобиль каналдан олиб чиқилган.
Ҳодиса оқибатида жабрланган ва ҳалок бўлганлар йўқ.
Юнусободда «Lada» ва «Газель» тўқнашди
Дастлабки маълумотларга кўра, 2022 йил 19 январь куни соат 12:40 ларда Тошкент шаҳар Юнусобод тумани Аҳмад Дониш ва Юнус ота кўчалари кесишган чорраҳада «Lada» ва «Газель» транспорт воситалари иштирокида тўқнашув содир бўлган.
Тўқнашув оқибатида тан жароҳати олган фуқаролар йўқ. Мазкур ҳолат юзасидан ҳайдовчилар томонидан ЙТҲ тўғрисидаги хабарнома тўлдирилган.
Фарғонада Lacetti чақалоқни босиб кетди
2022 йил 19 январь куни соат 11:00 ларда Фарғона шаҳар ҳудудидан ўтувчи 4Р-140А автомобиль йўлининг 8-километрида ҳайдовчи Й.А. (1987 йилда туғилган) Lacetti русумли автомобилни бошқараётиб, пиёдалар ўтиш жойидан йўлни кесиб ўтаётган фуқаро М.М.ни (2001 йилда туғилган) уриб юборган ва унинг қўлидан тушиб кетган фарзандини Ф.М.ни босиб кетган.
Ҳодиса оқибатида пиёда М.М.га биринчи тез тиббий ёрдам кўрсатилган, фарзанди Ф.М. эса (2021 йилда туғилган) тан жароҳати билан шифохонага ётқизилган.
Мазкур ЙТҲ юзасидан Фарғона вилояти ИИБ ҳузуридаги ТБ томонидан дастлабки тергов ҳаракатлари олиб борилмоқда.
Жиззахда Lacetti пиёдани уриб кетди
Фориш тумани «Дўстлик» маҳалла фуқаролар йиғини ҳудудидан ўтувчи Жиззах–Фориш–Қизилча 4Р-36 йўлининг 110-километрида йўл-транспорт ҳодисаси рўй берди. Навоий вилояти Нурота тумани «Сентоп» маҳалла фуқаролар йиғинида яшовчи шахс бошқарувидаги Lacetti билан йўл четида турган пиёдани уриб юборган. Ҳодисага қуюқ туман сабаб бўлди.
Фориш тумани «Дўстлик» маҳалла фуқаролар йиғинида яшайдиган жабрланувчи бош мия ёпиқ жароҳати, бош мия лат ейиши, чап оёқ болдир суяги синиши ташхиси билан шифохонага ётқизилган. Ҳолат юзасидан терговга қадар текширув ўтказилмоқда.
Яшнободда Matiz ағдарилиб, Spark билан тўқнашди
2022 йилнинг 19 январь куни соат 00:30 ларда Яшнобод тумани Фарғона йўли кўчасининг иккинчи даражали йўлида ҳайдовчи А.Н. (1989 йилда туғилган) Matiz автоуловини бошқариб кетаётиб, рул бошқарувини йўқотиши оқибатида бетон тўсиққа урилган. Оқибатда автоулов ағдарилиб, йўлнинг қарама-қарши йўналишидан ҳаракатланиб келаётган ҳайдовчи Ф.Ш. (1997 йилда туғилган) бошқарувидаги Spark билан тўқнашув содир этган.
Тўқнашув оқибатида Matiz ҳайдовчиси А.Н. ўнг оёқ эзилиб йиртилган жароҳати, бош ва юз шилиниши ташхиси билан; Spark йўловчиси Ф.М. (1981 йилда туғилган) бош соҳаси юмшоқ тўқималари лат ейиши ва чап қош соҳаси эзилиб йиртилган жароҳати билан касалхонага мурожаат қилган.
Дастлабки маълумотга кўра, йўл-транспорт ҳодисасига Matiz ҳайдовчисининг маст ҳолатда рул бошқарувини йўқотгани сабаб бўлган.
Изоҳ (0)