Qamchiq dovonida yuz bergan yo‘l-transport hodisalari tafsilotlarini taqdim etamiz.

HOWO boshqaruvni yo‘qotib ag‘anadi

Foto: FVV

2022-yilning 17-yanvar kuni soat 16:55 da Qamchiq dovonidan o‘tgan Toshkent–O‘sh avtomobil yo‘lining 195-kilometrida Vodiy–Toshkent yo‘nalishda harakatlangan HOWO yuk mashinasi haydovchisi boshqaruvni yo‘qotish oqibatida avtotransport vositasi yo‘l chetidagi kyuvetga tushib, yonboshlab qolgan.

Voqea joyiga zudlik bilan 2-mexanizatsiyalashgan nazorat-kuzatuv guruhidan 4 nafar qutqaruvchi, “Chinor” YPX maskani va “Qamchiqavtoyo‘l” IYFUK xodimlari yetib borib, maxsus texnikalar yordamida yuk mashinasini kyuvetdan chiqarib olishgan.

Avtomashinada haydovchi va bir nafar yo‘lovchi bo‘lgan, hodisa natijasida hech kim jarohat olmagan. Avtomashina yuksiz kelayotgan bo‘lgan.

Man yuk mashinasi ag‘darilishi oqibatida yo‘lovchi vafot etdi

2022-yil 11-yanvar kuni soat 21:30 larda Toshkent–O‘sh yo‘lining 221 kilometrida “Qo‘shminor” MFY hududida Buxoro viloyati Buxoro shahrida yashovchi, 1971-yilda tug‘ilgan fuqaro boshqaruvida bo‘lgan MChJga qarashli MAN yuk mashinasini yo‘l varaqasi bilan Vodiy–Toshkent yo‘nalishida boshqarib borayotib, harakat xavfsizligini ta’minlay olmagan. U boshqaruvni yo‘qotib, yo‘l chetidagi chuqurga tushib ketgan.

Oqibatda avtomashinada bo‘lgan yo‘lovchi – Buxoro viloyati Buxoro shahrida yashagan, 1974-yilda tug‘ilgan fuqaro voqea joyida vafot etgan.

Avtomashina haydovchisi bosh miya chayqalishi, bosh miya yopiq shikasti, qo‘shma shikast tashxisi bilan tan jarohati olib, shifoxonaga yotqizilgan.

Ushbu holat bo‘yicha Pop tuman IIB huzuridagi TB tomonidan 2022-yil 12-yanvar kuni Jinoyat kodeksining 266-moddasi 2-qismi (odam o‘limiga sabab bo‘lgan transportdan foydalanish) bilan jinoyat ishi qo‘zg‘atilgan.