Кунига икки литр сув ичиш кераклиги кўпчиликка маълум. Шунга қарамай, одатдагидан икки баравар кўп суюқлик ичадиганлар ҳам бор. Аслида, иккаласи ҳам яхши эмас. Келинг, ҳақиқат қандай эканлигини билиб олайлик.

Фото: «Домашний очаг»

Агар кунига икки литр сув ичиш одатга айланган бўлса, бу жуда яхши. Чунки кунига етарли миқдорда сув ичиш саломатлик ва гўзаллик гаровидир. Агар суюқлик ичиш меъёрига риоя қилинса, организмда қуйидаги ҳолатлар юз беради.

Метаболизм тезлашади

Тана 500 миллилитр суюқлик олгандан сўнг кейинги 30-40 дақиқада метаболизм тезлиги 30 фоизга ошиши исботланган. Натижада овқат ҳазм қилиш тизимининг иши нормаллашади ва вазн барқарорлашади. Организмда ортиқча ёғни эритиш учун масъул бўлган липаза ферменти мавжуд, у сувда эрийди ва танага етарли миқдорда суюқлик кирганда фаоллашади.

Шиш йўқолади

Шишишга мойил бўлган одамлар кўпинча шишмаслик учун кўп сув ичишдан қўрқади. Аслида, ҳамма нарса аксинча. Шиш терида сув кам бўлганлиги сабабли пайдо бўлади ва сувсизланишдан қўрқиб, уни тўплайди. Агар етарли миқдорда сув ичилса, танадаги бу қўрқув йўқолади, шиш бартараф этилади. Бу, айниқса, агар рационда кўп миқдорда туз мавжуд бўлса, жуда фойдали. Тўғри, 20:00 дан кейин сув ичмасликка ҳаракат қилиш керак, акс ҳолда кечки ортиқча суюқликдан кейин шиш пайдо бўлади.

Камроқ таом истеъмол қилинади

Кўпинча ташналик ва очлик чалкаштириб юборилади. Овқатланиб бўлгач ҳам қорин очгандек туйилса, бир стакан сув ичилса, очлик ҳисси ўтиб кетади. Бундан ташқари, ошқозондаги сув тўқлик ҳиссини беради ва зарарли егуликлар ейишдан сақлайди.

Тери кўриниши яхшиланади

Биринчидан, у эластик ва таранг бўлади. Иккинчидан, терининг етарли даражада намланиши ёғ ишлаб чиқаришни тартибга солади. Сув кам бўлса, тери уни намлаш учун қурийди, тешиклар ёғни фаол равишда ажрата бошлайди. Ҳаддан ташқари фаоллик ёғ безларининг тиқилиб қолишига олиб келади ва натижада ҳуснбузар пайдо бўлади. Шунинг учун ҳам сув ичиш керак.

Агар кўпроқ сув ичилса, организмда нима юз беради?

Кўп нарса фойдали дегани эмас. Ҳаддан ташқари чанқоқни қондириш бошқа оқибатларга олиб келиши мумкин, жуда кўп сув ичиш худди кам ичиш каби зарарли ҳисобланади.

Гипергидрация – бу биринчи навбатда сув-туз алмашинувининг бузилиши ҳақида хабар берадиган ташхис. Тиббиётда гипонатремия, сув билан заҳарланиш деб аталадиган ҳаддан ташқари гидратациянинг мураккаб шакли кам учрайди ва одатда сурункали буйрак касаллиги, иккинчи тоифа диабет ва юрак етишмовчилиги билан бирга келади.

Сувдан заҳарланиш учун ўн беш дақиқа ичида икки литрдан кўп сув ичиш керак. Аммо бу, хайриятки, жуда камдан кам ҳолларда содир бўлади. Энг ёмон аломатлардан — мия ҳужайраларининг шишиши ёки комага тушиш қисқа вақт ичида тахминан 4-5 литр сув ичилганда юз беради.

Умуман олганда, буйраклар соатига тахминан бир литр сув чиқариши мумкин, аммо суюқликнинг ортиқча ичилаётганини билиш учун қуйидаги аломатларни текшириш лозим.

  • кўнгил айниши;
  • тўқлик ҳисси, ошқозонда оғирлик;
  • шиш;
  • қон босими ортиши;
  • юрак муаммолари, тахикардия.