2021 йилнинг августида Навоийда ука акасини кетмон билан уриб, ўлдириб қўйгани тўғрисида хабар берилганди. Жиноят ишлари бўйича Хатирчи туман суди айбланувчи укага нисбатан суд ҳукми ўқилди, деб хабар беради ЎзА.
Маълум қилинишича, 2021 йилнинг 7 декабрь куни жиноят ишлари бўйича Хатирчи туман суди биносида ўтказилган очиқ суд мажлисида ўз акасининг ўлимига сабабчи бўлган Ш.О.га (1990 йилда туғилган) нисбатан жиноят иши кўриб чиқилган.
Ш.О. 2021 йил 4 август куни Навоий шаҳри «Ёшлик» маҳалла фуқаролар йиғини ҳудудида «Шоҳжаҳон Шамшири» масъулияти чекланган жамияти томонидан олиб борилаётган қурилиш объектининг 3-қаватида акаси Э.О. билан бирга овқатланган. Ака-ука спиртли ичимлик истеъмол қилган. Маст ҳолатда иш ҳақи масаласида акаси Э.О. билан ўрталарида ўзаро келишмовчилик келиб чиққан. Жанжал авжига чиқиб, Ш.О акасининг бош қисмига шу ерда турган кетмон дастаси билан бир маротаба уриб, унга тан жароҳати етказган.
Э.О. Республика шошилинч тез ёрдам илмий маркази Навоий вилояти филиалига ётқизилиб, кўрсатилган тиббий муолажаларга қарамасдан 9 август куни касалхонанинг жонлантириш бўлимида вафот этган.
Суд-тиббий экспертиза илмий-амалий маркази Навоий филиалининг 2021 йил 17 августдаги 137-сонли хулосасида марҳум Э.О.нинг танасида ҳаёт учун хавфли бўлган оғир тан жароҳатлари мавжудлиги ва бу жароҳатлар унинг ўлими сабаби билан бевосита боғлиқ эканлиги кўрсатилган.
Суд Ш.О.ни содир этган жиноятининг хусусияти ва ижтимоий хавфлилик даражаси, муқаддам судланмагани, айбига тўлиқ иқрорлиги, қонуний вакилнинг даъвоси йўқлиги, қилмишидан чин кўнгилдан пушаймонлиги, оилавий шароитини инобатга олиб, Жиноят кодекси 104-моддаси (қасддан баданга оғир шикаст етказиш) 3-қисми «д» банди Жиноят кодексининг 57-моддасини (енгилроқ жазо тайинлаш) қўллаб, 5 йилга озодликдан маҳрум қилиш жазоси тайинланган.
Аввалроқ Қашқадарёда ака-ука қарзини бермаган танишини пичоқлаб ўлдиргани, Андижонда онасига бақирган укаси билан жанжаллашиб, унинг ўлимига сабабчи бўлган ака 10 йилга қамалгани тўғрисида хабар берилганди.
Изоҳ (0)