Самарқанд вилоятининг Нуробод туманида яшовчи ўқувчи «Бир миллион дастурчи» лойиҳасида биринчи ўрин олгани ва унга ишлатилган ноутбук совға қилингани тўғрисида хабар берилганди. Ҳолатни ўрганиш давомида журналистларга «болага тарбия бермоқчи бўлсак, унинг ўз ҳаққини талаб қил деб ўргатмаслик керак», деб айтган вилоят халқ таълими бошқармаси бўлим бошлиғи Хуршид Розиқов вазифасидан озод этилди. Бу ҳақида «Дарё» мухбири хабар бермоқда.
Қайд этилишича, Самарқанд вилоят Халқ таълими бошқармаси педагогик-психологик ташхис фаолиятини ташкил этиш шўъбаси мудири Хуршид Ғозиев билан тузилган меҳнат шартномаси жорий йил 18 январидан эътиборан бекор қилинган. Бунга Хуршид Ғозиевнинг аризаси асос қилиб олинган.
Вилоят халқ таълими бошқармаси бўлим бошлиғи Хуршид Ғозиев «Бир миллион ўзбек дастурчилари» лойиҳаси доирасида ўтказилган танловда иштирок этиб, совғага эски ноутбук олган Сардор Сатторовнинг видеомурожаати юзасидан ўрганиш олиб борган ишчи гуруҳ ва журналистларга болага тарбия бермоқчи бўлинса, унга ўз ҳаққини талаб қил деб ўргатмаслик кераклигини билдирган.
«Биз бунақа йўналишни танламаслигимиз керак. Ҳар битта ота-онага, бошқа журналист ва блогерларга тавсиям: болага эртага ўзингни ҳаққингни талаб қил, мана бунақа ишларни амалга ошир эмас, яхши-яхши йўлларни ўргацак, улар эртага келажакда ўз ўрнини топиб кетади. Бунақанги йўл билан ҳаққини ажратиб олишни мен тўғри деб ўйламайман», — деб айтган эди вилоят ХТБ бўлим бошлиғи Хуршид Ғозиев.
Хуршид Ғозиевнинг бу гапи ижтимоий тармоқларда катта муҳокамаларга сабаб бўлиб, кўпчилик педагогнинг бу фикрларига эътироз билдирган.
Маълумот учун, Нуробод туманнинг 41-умумтаълим мактабининг 8-синф ўқувчиси Сардор Сатторов «Бир миллион ўзбек дастурчилари» лойиҳасининг вилоят босқичида 1-ўринни олишига қарамай, унга 3-даражали диплом ҳамда ишлатилган (эски) ноутбук совға қилинган. «Бу номардлар эскини бергунча битта китоб билан диплом берса бўлмасмиди? Чангини ҳам артмаган буни, ким билан неча йилдан бери чанг босиб ётган. Шунчалик ҳам номардлик бўладими?», — деган ўқувчининг бобоси.
Нуробод тумани ҳокимининг фармойиши IТ танловида ғолиб бўлган ёшларни тақдирлашда масъулиятсизликка йўл қўйгани учун туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Наврўзбек Жалолиддиновга нисбатан Меҳнат кодексининг 181-моддаси (интизомий жазолар) 1-бандига асосан ҳайфсан интизомий жазоси қўлланилган.
Шунингдек, Нуробод тумани Халқ таълими бўлими таълим жараёнига АКТни жорий этиш шў’баси бош мутахассиси Аслиддин Дангалов билан тузилган меҳнат шартномаси ҳам 17 январдан эътиборан бекор қилинган.
Кейинчалик IT Park ғолибга берилган ноутбук янгисига алиштириб берилганини маълум қилди.
«Дарё» манбаларининг маълум қилишича, Нуробод туман ХТБ мудири ва туман ҳокими ўринбосари ҳам лавозимидан озод этилиши кутилмоқда.
Изоҳ (0)