Тошкент шаҳри Учтепа туманида «Роллтон» бренди номидан қалбаки маҳсулот ишлаб чиқараётган яширин цех аниқланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Учтепа туман бўлими терговга қадар текширув ўтказган. Унда фуқаро Х.М. ўз уйида яширин цех ташкил қилиб, «Роллтон» бренди остида истеъмолчиларнинг соғлиғи хавфсизлиги талабларига жавоб бермайдиган маҳсулотни қўлбола ишлаб чиқариб, қадоқлаб сотиш учун тайёрлаб қўйилгани аниқланган.
Хонадондан 464 дона қадоқланган «Роллтон», 68 килограм сариқ ва 7,49 килограм қизил рангли кукунлар ва бошқа маҳсулотлар ашёвий далил сифатида олинган.
Шунингдек, фуқаро Х.М. томонидан ишлаб чиқарилган маҳсулот қалбаки экани, олинган кукунлар ҳақиқий компания томонидан ишлаб чиқарилмагани, қадоқланган пакетлардаги код рақамлари ҳам қалбаки экани аниқланган.
Ҳолат юзасидан Жиноят кодексининг 149-моддаси (муаллифлик ёки ихтирочилик ҳуқуқларини бузиш), 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда тергов ҳаракатлари ўтказилмоқда.
Мавзуга доир:
Изоҳ (0)