Ўзбекистонда солиқ юкининг оширилиши ҳалол ишлаб келаётган тадбиркорларга фойда бўлади. Бу ҳақда Давлат солиқ қўмитаси раиси Шерзод Кудбиев 17 январь куни бўлиб ўтган солиқ маъмуриятчилигидаги янгиликлар муҳокамасига бағишланган матбуот анжуманида айтиб ўтди, дея хабар бермоқда «Дарё» мухбири.
Шерзод Кудбиев йиғилганларга аксарият кичик корхоналар йиллар давомида мол-мулкини қайта баҳоламай келганлиги натижасида кўчмас мулкининг қолдиқ қиймати «паст» ёки «нол» бўлганлиги, шу боис, минимал қиймат асосида солиқ ҳисобланганда ушбу объектлар учун солиқ юки ортиши кузатилаётганини маълум қилди.
Таъкидланишича, 41 мингта объект қайта баҳоланмаганлиги сабабли уларнинг қиймати бозор баҳосига нисбатан кам эканлигини кўрсатиб турибди.
Бундан ташқари, мулкларини бозор нархларига яқинлаштириш мақсадида қайта баҳолаб келган 21,5 мингта солиқ тўловчида ставканинг пасайиши (2 фоиздан 1,5 фоизга) ҳисобига солиқ суммаси камайтирилаётгани айтилди.
Журналистлар билан савол-жавоб вақтида ДСҚ раисига журналистлардан бири пойтахтда 500 квадрат метрлик ери ва 500 миллион сўмлик биноси борлиги ҳамда у ерда ишлаб чиқариш билан шуғулланилиши ҳақида айтди. Журналистнинг сўзларига кўра, у 2 фоизлик солиқ тўловида 10 миллион сўм солиқ тўлар эди.
«Ҳозир сизлар 1,5 фоизга камайтириб, квадрат метрни 2,5 миллионга чиқариб қўйгандан кейин мен йилига 18,5 миллион сўм тўлайман йилига. Ҳозир сиз 40 мингдан ошиқ тадбиркорда солиқ фоизи кўпайганини айтдингиз. Энди менинг ўша ерда ишлаб чиқарадиган маҳсулотимнинг нархига таъсир қилади. Сиз айтган 40 мингдан ошиқ солиғи кўпайганлар нархни оширмайдими? Шу нарх баландлаши оқибатида инсонлар қийналиб қолмайдими?», — дея савол қўйди журналист.
Давлат солиқ қўмитаси раиси Шерзод Кудбиев эса мазкур саволга шундай жавоб берди:
«Худди шу саволнинг тескариси бор. 21 минг нафар тўғри ишлаб келаётган тадбиркорнинг айби нимада? Улар ўз вақтида кўрсатиб келяпти мулкини. Мен сизнинг Тошкент шаҳридаги 500 квадрат метрлик мулкингиз 500 миллион сўм туришига ишонмайман. Бунинг қиймати юқорироқ туради. Ўша каттароқ қийматдан тўлаш керак. Чунки масалан ёнингизда шунақа ишлаб чиқарувчи цех бор, у ҳалол ва катта қийматни кўрсатиб келяпти. У ўзининг маҳсулотининг нархига катта қийматни қўйиб келяпти. Ва катта қийматни қўйиб келиши натижасида ўша маҳсулоти сизникидан қимматроқ бўлиб қоляпти. Сизникидан қимматроқ бўлганидан кейин, у ҳам ҳалол ишлаб, ҳам бозорда рақобатда сизга ютқазяпти. Бу адолатлими?».
Шерзод Кудбиев биноларнинг қийматини қайта ҳисоблаб вақтида кўрсатиб бориш кераклиги ҳақида гапирди.
«Лекин вақтида кўрсатилмадими, муаммоларга дуч келинади. Шунда ҳам 2,5 миллион сўм бозор қиймати эмас, Тошкент шаҳрида эркин бозор нархи бир квадрат метрга 6 миллион сўм. Биз бунгача етиб борганимиз йўқ. Менинг фикримча, солиқ юкининг кўтарилиши ҳажм нуқтаи назаридан ва мол-мулк солиғини таннархдаги улуши нуқтаи назаридан жуда кичкина улушда ва таъсир қилмайди. Иккинчидан, ҳалол ишлаб келаётган тадбиркорларга бу фойда бўлади. Яъни аввалдан тўғри ишлаб келган тадбиркорларнинг рақобатбардошлиги ошади», — дея қўшимча қилади у.
Изоҳ (0)