2022 йил 1 январдан 2023 йил 1 январга қадар туризм фаолияти субъектлари ва авиаташувчиларнинг хорижий мамлакатлардан Ўзбекистонга чартер рейсларини ташкил қилиш бўйича туристик фаолияти субъектлари ва авиаташувчиларнинг харажатларини қоплаш бўйича давлат бюджетидан ажратилган компенсация миқдори камайтирилди. Бу ҳақда «Туризм, маданият, маданий мерос ва спорт соҳаларини янада ривожлантириш учун қўшимча шароитлар яратиш тўғрисида»ги президент фармонида сўз боради. Фармон матни ЎзАда эълон қилинган.
Хусусан, ҳар бир хорижий турист учун, у республика ҳудудида камида беш кеча тунаб қолган тақдирда, 10 АҚШ доллари, қиш мавсумида (20 ноябрдан 20 февралгача) эса 25 АҚШ доллари миқдорида давлат бюджети маблағлари ҳисобидан қоплаб берилади.
2022 йил 1 майдан бошлаб ёшларнинг тадбиркорлик ташаббусларини қўллаб-қувватлаш мақсадида давлат бюджетидан Туризм ва спортни қўллаб-қувватлаш жамғармасига ажратиладиган маблағлар ҳисобидан ҳар бир ташаббускорга 50 миллион сўм миқдорида, жами 10 миллиард сўмгача грантлар ажратилади. Бунда:
- грант маблағлари онлайн тўловларни қабул қилувчи замонавий веб-сайт яратишга, хорижий мамлакатлардаги туризм кўргазма ва ярмаркаларида иштирок этишга йўналтирилади;
- грант маблағлари белгиланган тартибда хорижий мамлакатлардан Ўзбекистонга уч йил давомида камида 200 нафар хорижий туристлар учун тур ташкил қилиш шарти билан ажратилади.
Эслатиб ўтамиз, компенсация 2020 йилнинг 1 январидан жорий этилганди. Ўшанда унинг миқдори бир турист учун 20 долларни (қишки мавсумда — 50 долларни) ташкил этганди. Бу давлат бюджети ва туризмни ривожлантириш Давлат қўмитаси ҳузуридаги Туризм соҳасини қўллаб-қувватлаш бюджетдан ташқари жамғармаси (эндиликда Туризм ва спорт ишлари вазирлиги ҳузуридаги Туризм ва спортни қўллаб-қувватлаш жамғармаси) ҳисобидан тенг улушларда тўлаб келинган.
Изоҳ (0)