Ўзбекистонда «Қаровсиз ҳайвонлар билан ишлашни тубдан такомиллаштириш чора-тадбирлари тўғрисида»ги президент қарори лойиҳаси ишлаб чиқилмоқда. Бу ҳақда Telegram’даги «Экологуз» канали хабар берди.
Маълумотларга кўра, қарор билан Қорақалпоғистон Вазирлар Кенгаши, вилоятлар ва Тошкент шаҳар ҳокимликларининг ҳудудларни Ободонлаштириш бошқармасига қарашли қаровсиз ҳайвонларни овлаш бригадаларини тугатиш режалаштирилган. Уларнинг функция ва ваколатлари Ветеринария қўмитасига ўтказилади.
Ветеринария қўмитаси қуйидагилар билан шуғулланади:
- қаровсиз ҳайвонлар популяциясининг ўсишини назорат қилиш;
- ҳар бир ҳудудда ҳайвонлар бошпаналарини ташкил этиш;
- зотдор ҳайвонларни сертификатлаш;
- статистикани юритиш.
Шу билан бирга, эвтаназия тартиби фақат касал, агрессив қутурган ҳайвонларга нисбатан қўлланилиши белгиланган.
Бундан ташқари қарор лойиҳасида мушукларга нисбатан уларни эмлаш (чиплаш), стериллаш қўлланилиб, уларни яна кемирувчилар кўпаймаслиги учун қайтиб қўйиб юбориш назарда тутилган. Чипланган ҳайвонлар ва уларнинг эгалари бўйича электрон базани яратиш ҳам қарор лойиҳасида мавжуд.
Эслатиб ўтамиз, 2021 йилнинг апрелида «Меҳр ва оқибат» ҳайвонларни ҳимоя қилиш жамияти вилоятлар ветеринарларини Тошкентдаги хусусий клиникаларда бошпанасиз ит ва мушукларни стерилизация ҳамда кастрация қилиш (бичиш) бўйича ўқитиш лойиҳасини ишга туширганди.
Изоҳ (0)