Ижтимоий тармоқларда Самарқанд вилоятининг Нуробод туманида яшовчи ўқувчи «Бир миллион дастурчи» лойиҳасида биринчи ўрин олгани ва унга ишлатилган ноутбук совға қилингани тўғрисида хабар берилганди. Нуробод тумани ҳокимининг фармойиши билан мазкур ҳолатда масъулиятсизликка йўл қўйган ҳоким ўринбосарига ҳайфсан берилди, деб хабар беради «Дарё» мухбири.
« ‘Бир миллион ўзбек дастурчилари’ лойиҳаси доирасида умумтаълим мактаблари ўқувчилари ўртасида ўтказилган IT-танловида ғолиб бўлган ёшларни тақдирлашда масъулиятсизликка йўл қўйгани учун туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Наврўзбек Жалолиддиновга нисбатан Меҳнат кодексининг 181-моддаси (интизомий жазолар) 1-бандига асосан ҳайфсан интизомий жазоси қўлланилсин», — дейилади фармойишда.
Туманнинг 41-умумтаълим мактабининг 8-синф ўқувчиси Сардор Сатторов «Бир миллион ўзбек дастурчилари» лойиҳасининг вилоят босқичида 1-ўринни олишига қарамай унга 3-даражали диплом ҳамда ишлатилган (эски) ноутбук совға қилинган. «Бу номардлар эскини бергунча битта китоб билан диплом берса бўлмасмиди? Чангини ҳам артмаган буни, ким билан неча йилдан бери чанг босиб ётган. Шунчалик ҳам номардлик бўладими?», — дейди ўқувчининг бобоси.
Маълумот учун, 2019 йилнинг 21 ноябрида Ўзбекистонда дастурчиларни бепул тайёрловчи One Million Uzbek Coders лойиҳаси ишга туширилганди. Лойиҳа биринчи навбатда маҳаллий аҳолига, асосан, ёшларга ахборот технологиялари мутахассисликларида арзон ва сифатли таълим олиш имкониятини беради. Лойиҳа Бирлашган Араб Амирликлари ҳукумати, Ўзбекистон Ахборот технологиялари ва коммуникацияларини ривожлантириш вазирлиги, Тошкент шаҳридаги Инҳа университети ва IT-Park қошидаги IT-академия кўмагида амалга оширилмоқда.
Изоҳ (0)