Ижтимоий тармоқларда Мажбурий ижро бюросининг Андижон шаҳар бўлими ходимларлари суд қарорини бажариш эвазига 4 минг доллар пора олгани ҳақида хабарлар тарқалди. Бюро матбуот хизматининг «Дарё»га маълум қилишича, ҳолат юзасидан жиноят иши қўзғатилган.
Маълум қилинишича, 14 январь куни фуқаро О.Қ.нинг аризасига асосан Андижон вилоят ҳуқуқни муҳофаза қилувчи органлар, вилоят прокуратураси ва Мажбурий ижро бюросининг вилоят бошқармаси Шахсий хавфсизлик бўйича ходимлари томонидан тезкор тадбир ўтказилган. Тадбир давомида бюронинг Андижон шаҳар бўлими ижрочиси Ф.Ф. ўз иш юритувидаги қарздор У.Х. ва бошқаларни мажбурий кўчириш тўғрисидаги ижро ҳужжатини ижро қилиб бериш эвазига Андижон туман бўлими давлат ижрочиси И.Қ. билан бирга, Андижон шаҳрининг «Ватан» чойхонаси яқинидаги бекатда фуқаро О.Қ.дан 4000 доллар олган вақтларида ашёвий далиллар ушланган.
Мазкур ҳолат юзасидан Андижон вилоят прокуратураси томонидан Ф.Ф. ва И.Қ.га нисбатан Жиноят кодексининг 210-моддаси (пора олиш) 2-қисми «в, г» бандлари билан жиноят иши қўзғатилган.
Таъкидланишича, Мажбурий ижро бюроси ходимлар ўртасида шахсий хавфсизлик бўйича тармоқлар хизмат мавқейини суиистеъмол қилиш ва бошқа ножўя хатти-ҳаракатлар содир этиш ҳолатларининг олдини олиш ҳамда бунга имкон берган шарт-шароитларга барҳам бериш борасида профилактик ишлар олиб борилмоқда (ўтган йилда 3119 та ана шундай профилактик тадбирлар ўтказилган). «Ўтган даврда, хизмат текширувлари натижаларига кўра, қўпол қонунбузилишига йўл қўйган 69 нафар ходим интизомий жазо тариқасида бюро органларидан бўшатилган. Биргина, ўтган даврда бюронинг 24 нафар ходими томонидан содир этилган жиноят ҳолатларининг 18 таси шахсий хавфсизлик тармоқ ходимларининг ташаббуслари асосида фош этилган», — дейилади хабарда.
Аввалроқ Бухорода қарзни ундиришга келган МИБ ходимини калтаклаган корхона раҳбари жавобгарликка тортилгани, Андижонда МИБ ходимини пичоқ билан жароҳатлаган фуқаро қамоққа олингани тўғрисида хабар берилганди.
Изоҳ (0)