Uzbekistan Airways авиакомпаниясининг самолёти Минск миллий аэропортида учиш-қўниш йўлагидан чиқиб кетди. Бу ҳақда аэропорт матбуот хизмати хабар берди.
Тошкент—Минск йўналиши бўйича парвозни амалга оширган Airbus А-320 самолёти кучли қор ва бўрон оқибатида Минск миллий аэропортига муваффаққиятли қўнишни амалга оширган, бироқ бошқарув вақтида учиш-қўниш йўлагидан чиқиб кетган.
Ҳаво кемаси бортида 115 нафар йўловчи бўлган. Дастлабки маълумотларга кўра, жабрланганлар йўқ. Кўнгилсиз ҳодиса оқибатида самолётга шикаст етмаган.
Таъкидланишича, ҳозирда воқеа жойида авария-қутқарув хизматлари иш олиб бормоқда.
Telegram’даги «МотолкоПомоги» канали маълумотларига кўра, Uzbekistan Airways самолёти билан содир бўлган воқеа сабаб «Belavia» авиакомпаниясининг Санкт-Петербург—Минск йўналиши бўйича учган рейси Лепел шаҳри бўйлаб айланмоқда. Шунингдек, Москва—Минск бўйича учган B2958 рейси ҳам айнан шу сабаб аэропортга қўна олмаяпти.
Иккала рейс ҳам Санкт-Петербугга йўл олган. Фавқулодда ҳолат сабаб Лукашенконинг Boeing 767-300 самолёти ҳам қўнишни амалга ошира олмай, Брест томонга учган.
Изоҳ (0)