12 январь куни Туркманистон президенти Гурбангули Бердимуҳамедов Хавфсизлик кенгашининг кенгайтирилган йиғилишини ўтказди, деб хабар беради «Хроника Туркменистана».
Маълум қилинишича, йиғилиш давомида давлат раҳбари ички ишлар вазири ўринбосари подполковник Мират Бабагулиевни ҳеч қандай тушунтиришларсиз лавозимидан озод этган. Ашхобод полиция бошқармаси бошлиғи майор Вепали Атаев ички ишлар вазирининг янги ўринбосари этиб тайинланган. Ўз навбатида, майор Мердан Муҳамметмирадов Ашхобод полиция бошқармаси бошлиғига айланган.
Президент ишдан олган ички ишлар вазири ўринбосари 2021 йилнинг августида лавозимга тайинланган эди. Шундай қилиб Бабагулиев мазкур лавозимда ярим йилдан камроқ ишлади.
Эслатиб ўтамиз, 2021 йилнинг июнида Гурбангули Бердимуҳамедов ички ишлар вазирига танбеҳ бериб, унинг ўринбосарини ишдан бўшатганди. Ўшанда Туркманистон президенти «ишидаги жиддий камчиликлари учун» ички ишлар вазирининг ўринбосари, ички ишлар подполковниги Жумамурат Нураевни ўз лавозимидан озод қилган. Шунингдек, Бердимуҳамедов «хизмат вазифаларини лозим даражада бажармагани, назорат қилинадиган хизматлар устидан назоратни сусайтиргани учун» ички ишлар вазири Чакиевга камчиликларни имкон қадар тезроқ тузатиш тўғрисида сўнгги огоҳлантириш билан қаттиқ танбеҳ берган эди.
Изоҳ (0)