Bugun,

  • USD 11095.31
  • RUB 173.84
  • EUR 10772.44

Turkmaniston prezidenti Gurbanguli Berdimuhamedov 20-dekabr kuni ishchi yig‘ilish o‘tkazdi, unda savdo majmuasi rahbarlari galma-galdan hisobot berdi, deb yozmoqda “Xronika Turkmenistana”.

Foto: “Xronika Turkmenistana”

Foto: “Xronika Turkmenistana”

Yig‘ilishda bosh vazirning savdo masalalari bo‘yicha o‘rinbosari Chori Qilichov, Savdo va tashqi iqtisodiy aloqalar vaziri Orazmurod Gurbannazarov Yangi yil bayrami arafasida bozorlarni oziq-ovqat mahsulotlari bilan ta’minlash to‘g‘risida hisobot o‘qidi.

Sanoatchilar va tadbirkorlar uyushmasi raisi Dovran Xudayberdiyevning aytishicha, tadbirkorlar tomonidan zarur mahsulotlar ishlab chiqarishni ko‘paytirish borasidagi ishlar izchil davom ettirilmoqda.

Hisobotlardan so‘ng Berdimuhamedov bosh vazir o‘rinbosarlarini tanqid qildi.

“Mahsulot assortimentini kengaytirishga qaratilgan tadbirlarni, shuningdek, ayrim tashkiliy ishlarni amalga oshirishda qoidabuzarliklarga yo‘l qo‘yilmoqda” — dedi Gurbanguli Berdimuhamedov. So‘ng u Qilichov va Gurbannazarovga “o‘z xizmat vazifalarini zarur darajada bajarmagani, tasarrufidagi muassasalar faoliyati ustidan nazoratni susaytirgani” uchun so‘nggi ogohlantirish bilan qattiq tanbeh berdi.

Bosh vazir o‘rinbosari Qilichov shu yilning 8-oktabrida hamda 2020-yilning 21-avgustida “so‘nggi ogohlantirish bilan” shunday tanbehlar olgandi.

Berdimuhamedov mutasaddilarga talabni o‘rganish, savdo madaniyati, xizmat ko‘rsatish sifatini oshirish va raqamli tizimni joriy etish bo‘yicha topshiriqlar berdi. Prezident, shuningdek, Yangi yil bayrami arafasida bozorlar va savdo markazlarini mahsulotlar bilan to‘liq ta’minlash, mahalliy mahsulotlarni eksport qilish hajmini oshirish yuzasidan ham tegishli topshiriqlar berdi.

Turkmaniston prezidenti 17-dekabr kungi Vazirlar Mahkamasi yig‘ilishida bosh vazir o‘rinbosarlarining barchasiga Yangi yil bayrami arafasida do‘kon va bozorlarni aylanib chiqishni, tovarlar narxlari bilan yaqindan tanishishni buyurgandi.

Gurbanguli Berdimuhamedov bayramlar oldidan Turkmaniston bozorlarida mahsulot mo‘l-ko‘lligini ta’minlash bo‘yicha muntazam topshiriqlar berib kelmoqda. Natijada Ashxobod bozorlarida mahsulotlar (Betaraflik kunida go‘sht va qandolat mahsulotlari) arzonlashdi. Biroq ko‘pincha bu mahsulotlarning sifati past bo‘ladi va hammaning talabini qondirmaydi. Bayramlardan keyin mahsulotlar yana tugaydi yoki ularning narxi avvalgi darajaga ko‘tariladi, deya qayd etgan “Xronika Turkmenistana”.

Izoh
Asosiy yangiliklar
Mahalliy
“Daryo” kundaligida 2-dekabrda sodir bo‘lgan eng muhim voqealar
Mahalliy
“Ifloslantiruvchi to‘laydi” tamoyili, “yashil sertifikatlar”, energiya ulushini kamaytirish: Mirziyoyev “yashil” iqtisodiyot taqdimoti bilan tanishdi
Dunyo
Britaniya razvedkasi Rossiya Ukrainadagi urushda quruqlikdan hujum qilolmayotgani sababini tushuntirdi