Арманистон ва Озарбайжон чегарасидаги отишма оқибатида арман армиясининг олти нафардан саккиз нафаргача ҳарбий хизматчиси ҳалок бўлган. Бу ҳақда Озарбайжон президенти Илҳом Алиев маҳаллий телеканалларга берган интервьюсида маълум қилди.
«Куни кеча озарбайжонлик ҳарбий хизматчиларга қарши навбатдаги ҳарбий провокация содир этилди, бу мутлақо асоссиз тажовуз оқибатида озарбайжонлик ҳарбий хизматчи ҳалок бўлд. Мудофаа вазиридан олган маълумотларимга кўра, душман томоннинг олти нафардан саккиз нафаргача ҳарбий хизматчиси йўқ қилинган, кўпчилиги жароҳат олган», — дейди Алиев.
Унинг сўзларига кўра, соат 21:30 да ўт очишни тўхтатиш буйруғини берган ва арман томонига кўп сонли яраланганларни олиб кетиш имкони берилган.
Отишма 11 январь куни содир бўлган. Арманистон Мудофаа вазирлиги Озарбайжон ҳукуматини провакацияда айблаган ва уч нафар ҳарбий хизматчиси ҳалок бўлганида ҳамда икки нафари жароҳат олганини маълум қилган.
Ўз навбатида Озарбайжон томони Арманистонни провакацияда айблаган. Шунингдек, Боку бир нафар ҳарбий хизматчиси ҳалок бўлганини билдирган.
Аввалроқ Илҳом Алиев 2022 йилни Озарбайжонда «Шуша шаҳри йили» деб эълон қилгани тўғрисида хабар берилганди.
Эслатиб ўтамиз, 2020 йил кузида Тоғли Қорабоғ атрофида кузатилган Арманистон ҳамда Озарбайжон ҳарбийларининг қуролли тўқнашувларидан кейин Тоғли Қорабоғга қарши еттита туман Боку ихтиёрига ўтган Сюникск ва Гегаркун вилоятлари арманларнинг озарбайжонлар билан чегара ҳудуди деб ҳисоблана бошланган. Вазият 2021 йил 12 майда яна кескинлашган. Шундан буён икки томон янги қуролли тўқнашувлар, кўнгилсиз ҳодисалар содир бўлаётгани ҳақида хабар бериб турибди.
Изоҳ (0)