Қашқадарё вилояти Қарши шаҳрида 2021 йил 17 август куни ушу-санда бўйича жаҳон чемпиони, MMA жангчиси Элбек Раҳимов ўлдириб кетилганди. 2022 йилнинг 6 январь куни мазкур иш бўйича бошланган суд 13 январь куни ўз ишини давом эттирди. Бу ҳақда «Дарё» мухбири хабар бермоқда.
Қайд этилишича, навбатдаги суд мажлисида марҳум спорт устаси Элбек Раҳимов ўлими бўйича айбланаётган 26 нафар айбланувчининг айблов хулосаси ўқиб эшиттирилган.
«Элбек Раҳимовнинг ўлимидан ташқари, бир гуруҳ шахсларнинг бошқа жиноятлар содир этгани, қолаверса, шу ишга алоқадор бошқа шахсларга нисбатан айблов эълон қилиниб, жами 26 нафар шахсга нисбатан жиноят иши қўзғатилиб, судга юборилгани боис ушбу шахслар иши кўрилмоқда. Ҳали суд давом этаётгани сабаб судланувчиларнинг шахсини очиқлай олмаймиз», — дейди суд жараёнлари ҳақида гапирган суд ахборот хизмати раҳбари Фарҳод Тиловов.
Қўшимча қилинишича, мазкур судгача бўлиб ўтган тергов жараёнида пора олиш, пора бериш ва жиноятни ҳисобга олишни қасддан яшириш, далилларни сохталаштириш каби ҳолатлар ҳам аниқланган.
Эслатиб ўтамиз, спорт устаси Элбек Раҳимов 17 август куни соат 09:45 да кўп қаватли уйдаги хонадони олдида бир гуруҳ шахслар томонидан ўлдириб кетилган. «Йигитни аввалига роса дўппослашган. Сўнгра пичоқлаб, яримжон ҳолатда машинага тиқиб олиб кетишган. Марҳумнинг жасади Чироқчи туманининг Еттитом қишлоғидан топилган», — деган «Дарё» мухбири билан суҳбатлашган манба.
Содир бўлган мудҳиш қотиллик ҳақида гапирган воқеа гувоҳлари 102 қисқа рақамларига хабар берилганидан сўнг, ИИБ ходимлари воқеа жойига 40-45 дақиқада етиб келганини, шу боис қотилликнинг олди олинмаганини айтган. «102 га шахсан ўзим уч марта қўнғироқ қилдим. Хўп, ариза қабул қилинди, ёзиб олдик, дея менга қўполлик қилишди. Улар келишганда эса, безори болалар йигитни яримжон ҳолатда машинага тиқиб олиб кетишганди», — деган гувоҳлардан бири.
Судланувчилар Жиноят кодексининг 97 (қасддан одам ўлдириш), 28,104 (қасддан баданга оғир шикаст етказиш), 104, 105 (қасддан баданга ўртача оғир шикаст етказиш), 109 (қасддан баданга енгил шикаст етказиш), 127 (вояга етмаган шахсни ғайриижтимоий хатти-ҳаракатларга жалб қилиш), 28,137 (одам ўғирлаш), 137, 169 (ўғрилик), 210 (пора олиш), 28,211 (пора бериш), 230-1 (далилларни сохталаштириш (қалбакилаштириш), 238 (ёлғон гувоҳлик бериш), 241-1 (жиноят ҳақида хабар бермаслик ёки уни яшириш), 28,277 (безорилик) моддаларида назарда тутилган жиноятларни содир этганликда айбланмоқда.
Изоҳ (0)