Жиззахда Gentra маст пиёдани уриб кетди, Чироқчида Nexia ёниб кетди. Йўлларда содир бўлган бахтсиз ҳодисалар тафсилотлари

Ўзбекистон йўлларида содир бўлган ҳодисалар тафсилотларини тақдим этамиз.

Жиззахда Gentra маст пиёдани уриб юборди

2022 йил 6 январь куни соат 18:50 ларда Жиззах вилояти Зарбдор тумани ҳудудидан ўтган А-376 Қўқон–Жиззах йўлининг 274-километрида Gentra автомобилида йўлнинг белгиланмаган қисмидан кесиб ўтаётган маст фуқарони уриб юборди.

Оқибатда 63 ёшли фуқаро воқеа жойида вафот этган. Ҳолат юзасидан тергов жараёнлари бошланган.

Қаршида Damas Lacetti’га «етиб олди»

2021 йил 8 декабрь куни соат 11:40 ларда Қашқадарё вилояти Қарши шаҳар Мустақиллик кўчасида ҳайдовчи Ш.М. (1985 йилда туғилган) Damas автомобилини бошқараётиб, ўзи билан бир йўналишда олдинда бўлган ЙПХ ходими Р.Турсунов бошқарувидаги Lacetti автомобилининг орқа томонига тўқнашиб, ЙТҲ содир этган.

ЙТҲ оқибатида Damas автомобилида бўлган бир нафар йўловчига биринчи тез тиббий ёрдам кўрсатилган.

Мазкур ЙТҲ юзасидан Қарши шаҳар прокуратураси томонидан суриштирув ҳаракатлари олиб борилмоқда.

Тошкентда икки Nexia-3 ва Matiz тўқнашди

Дастлабки маълумотларга кўра, 2022 йил 10 январь куни соат 22:20 ларда Тошкент шаҳар Олмазор тумани Чимбой кўчаси 222-уй рўпарасида Matiz ва иккита Nexia-3 иштирокида тўқнашув содир бўлган.

Тўқнашув натижасида икки нафар ҳайдовчи ва бир нафар йўловчи тан жароҳати билан шифохонага олиб кетилган. Ҳозирда воқеа жойида Тошкент шаҳар ИИББ ЙҲХБ ходимлари томонидан суриштирув олиб борилмоқда.

Чироқчида Nexia ёниб кетди

2022 йил 11 январь куни соат 14:55 ларда Қашқадарё вилояти Чироқчи тумани ҳудудидан ўтган Еттитом–Ғузор автомобиль йўлининг 10-километрида, ҳайдовчи А.Х. (1985 йилда туғилган) Nexia автомобилида ҳаракатланиб кетаётган вақтда транспорт воситасининг двигатель қисмида қисқа туташув ва унинг ортидан ёнғин юзага келган. Ҳайдовчи автомобилни зудлик билан тўхтатган.

Ёнғин ўт ўчирувчилар томонидан бартараф этилган. Ҳодиса натижасида тан жароҳати олган фуқаролар йўқ.

Мазкур ҳодиса юзасидан Чироқчи тумани ФВБ ва ЙҲХБ ходимлари томонидан суриштирув олиб борилмоқда.