Юртимиздаги маҳаллаларда олиб борилаётган ободончилик ишларини қўллаб-қувватлаш билан бирга, аҳолини қийнаётган баъзи муаммо ва камчиликларни ёритиб бориш мақсадида «Дарё» «Нообод маҳалла» лойиҳасини йўлга қўйди.
Лойиҳамиз нишонидаги биринчи маҳалла — Сергели туманидаги «Сўғдиёна» маҳалласи.
Биз тасвирга олиш гуруҳимиз билан мазкур маҳаллага бориб, у ердаги муаммоларни ўрганиб чиқдик.
Белгиланган манзилга етиб келганимизда, жуда ҳам аянчли манзарага гувоҳ бўлдик. Йўл тугаб, ботқоқ бошланди. Бунинг устига, мана шу ботқоқнинг бир чети ахлатхонага ҳам айланиб кетган. Бу юртимизнинг чекка бир вилояти эмас, пойтахтдаги маҳаллада кузатилаётган ҳолат.
4 ой аввал, 2020 йилнинг сентябрь ойида «Сўғдиёна» маҳалласининг ички кўчалари асфальт қилинган. Бу ҳақида Сергели тумани ҳокимиятининг Facebook’даги расмий саҳифасида фотоҳисобот ҳам бор.
Аммо ўшанда негадир баъзи кўчаларнинг маълум қисми асфальтдан бебаҳра қолиб кетган. Масалан, Зарунар 2-тор кўчасидаги 70 метр масофадаги ҳудудда асфальт йўқ. Мазкур кўчани асфальт қилишга масъул бўлган пудратчи ташкилот ходими Дониёр Усмонов биз билан суҳбатда бу ерга қачон асфальт ётқизилишини маълум қилди.
Бу кўчани асфальт қилиш 2021 йилнинг декабрь ойида режага киритилган. Аммо ёғингарчиликлар сабабидан ерлар нам бўлгани туфайли ишлар тўхтаб қолганди. Ҳозир ер қуришини кутяпмиз. Ҳаво исиб, намлик кетиши билан асфальт ётқизамиз.Дониёр Усмонов, «Йўлкўприктаъмир» МЧЖ ходими
Маҳалла ҳудудидаги ботқоққа айланган бошқа ички йўллар бўйича маҳалла раиси Аҳмаджон Комилжонов изоҳ бериб ўтди.
Бу йўлларни ҳозирча асфальт қилишнинг иложиси йўқ. Сабаби йўл бўйидаги уй-жойлар қурилиши ва таъмири ҳали якунланмаган. Бу ерга 40-50 тонналик техникалар кириб-чиқади. Киргандан кейин асфальтни «ўйнатиб» юборади. Шу сабабли ҳозирча бу ерга шағал тўкиб қўйиш режалаштирилган.Аҳмаджон Комилжонов, «Сўғдиёна» МФЙ раиси
Шунингдек, белгиланмаган жойларга чиқиндиларни ташлаб кетиш муаммоси ҳам «Сўғдиёна» маҳалласи аҳолисини анчадан бери қийнаб келяпти. Хусусан, Зарунар кўчасига кираверишидаги ҳудуд маҳалла раиси ва фуқаролар томонидан бир неча бор тозаланганига қарамай, бу ерга ахлат ташлаш яна давом этмоқда. Ташланган чиқиндилар ёқимсиз ҳид манбаси бўлиш билан бирга, атрофга касаллик тарқалишига ҳам сабаб бўлиши ҳеч кимга сир эмас.
Маҳалла раиси Аҳмаджон Комилжонов бу муаммони ҳал қилиш учун ҳудудга кузатув камералари ўрнатилишини айтиб ўтди.
Маҳаллани чиқиндилардан тозалаганимизга ҳали бир ой ҳам бўлгани йўқ. Ҳамма кўчаларни «чиннидек» қилиб қўйгандик. Аммо одамлар яна ахлат ташламоқда. Бу ёғи одамларнинг ўзига боғлиқ. Буни бегоналар эмас, шу ерда яшайдиганлар қилади. Энди ахлат ташланаётган кўчаларга кузатув камералари ўрнатамиз. Ҳудуд тўлиқ назоратда бўлади.«Сўғдиёна» маҳалласини пиёда айланиб, яна бир ҳолатга эътибор қаратдик. Асфальт қилинган кўчаларда канализация қудуқларининг қопқоқлари йўқ. Унинг ўрнига тош бостириб қўйилган, бу эса машиналар ҳаракатланишида хавф туғдирмоқда.Аҳмаджон Комилжонов, «Сўғдиёна» МФЙ раиси
Шунингдек, ётқизилганига кўп бўлмаган асфальт аллақачон ёрилишни бошлаган.
«Сўғдиёна» маҳалласида анчадан бери ҳал бўлмай келаётган яна бир муаммо — ёрилган сув қувурлари. Улардан тоза ичимлик суви сизиб чиқиб, исроф бўлмоқда.
5 йилдан бери «труба»ларни янгилаймиз дейишади, лекин келишмайди. «Водоканал» ҳам безор бўлиб қолган. Чақирсак дарров: «Бетон кўчами?» деб сўрашади. Лекин натижа йўқ.Усмон Хизиралиев, «Сўғдиёна» маҳалласи фуқароси
Маҳалла раиси Аҳмаджон Комилжонов канализация қудуқлари қопқоқлари ва ёрилган қувурлар бўйича қуйидагича изоҳ бериб ўтди.
У ерда бор-йўғи 3 дона «колодес» қопқоғи етишмайди, холос. Шуниям энди ёзув-чизув қилиб, харид қилиб беришларини сўраб ўтириш тўғри бўлмаса керак. Аҳолининг ўзи билан гаплашиб, пул йиғиб, қопқоқлар сотиб оламиз. Ёрилган сув қувурлари бўйича эса биз кўп мурожаат қилганмиз. Келиб ямашди, хомутлар қўйишди. Фойдаси бўлмади. «Сувсоз» раҳбари шу йилнинг биринчи чорагида қувурларни алмаштириб беришга ваъда берган.Умид қилиб қоламизки, «Сўғдиёна» маҳалласидаги юқорида тилган олинган муаммолар ваъда қилинган вақтларда ҳал қилинади ва ушбу маҳалла ҳақиқий обод масканга айланади.Аҳмаджон Комилжонов, «Сўғдиёна» МФЙ раиси
Агар сизнинг маҳаллангизда ҳам мана шундай муаммолар бўлса, бизга @daryo_livebot орқали мурожаат қилинг. Биз мутассаддиларнинг эътиборини мазкур муаммоларга қаратишга ва уларнинг ечимини излашга уриниб кўрамиз.
Изоҳ (0)