«Ўсимликлар карантини ва ҳимояси тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун президент томонидан имзоланди, деб хабар беради Telegram’даги «Ҳуқуқий ахборот» канали.
Қонун билан Маъмурий жавобгарлик тўғрисидаги кодексга қуйидаги ўзгартиришлар киритилган:
- ўсимликлар карантини объектларига ва бошқа зарарли организмларга қарши курашишга доир фитосанитария талабларини ҳамда бошқа қоидаларни карантин остидаги маҳсулотларни ишлаб чиқариш, тайёрлаш, сақлаш, ташиш, қайта ишлаш, реализация қилиш ва йўқ қилиш чоғида бузиш – фуқароларга БҲМнинг 3 бараваригача (810 минг сўмгача), мансабдор шахсларга 5 бараваригача (1 миллион 350 минг сўмгача);
- карантин остидаги маҳсулотларни Ўзбекистонга олиб кириш ва олиб чиқиш қоидаларини бузиш – фуқароларга БҲМнинг 5 бараваригача (1 миллион 350 минг сўмгача), мансабдор шахсларга 10 бараваригача (2 миллион 700 минг сўмгача) миқдорда жарима солишга сабаб бўлади.
Унга кўра, фитосанитарияга оид юқори хавфга эга бўлган карантин остидаги маҳсулотни, шу жумладан, экиш, пайвандлаш, кўпайтириш учун мўлжалланган экиш материалларини хорижий мамлакатлардан Ўзбекистонда яшовчи фуқароларга почта ва курьерлик жўнатмаларида юбориш, шу жумладан, багажда ва қўл юкида олиб ўтиш тақиқланади.
Қонун расмий эълон қилинган кундан эътиборан 3 ой ўтгач кучга киради.
Аввалроқ Ўзбекистонда таркибида хавфли зараркунандалар аниқлангани сабабли 775 тонна картошка йўқ қилинганди. Бунга Эрон ва Покистондан олиб кирилаётган картошкаларда карантин аҳамиятига эга ўта хавфли зарарли организмлар — олтинранг ва нимранг нематодалар билан зарарланиш ҳолатлари тизимли равишда аниқланаётгани сабаб бўлган.
Изоҳ (0)