«Пахтакор»га янги бош мураббий тайинланди, Тошкент клубини яна хорижлик мутахассис бошқаради

«Пахтакор» футбол клуби Славче Войнески билан шартнома имзоланганини эълон қилди.

Клуб матбуот хизматининг ёзишича, шимолий македониялик 47 ёшли мутахассис билан 2022 йил охирига қадар мўлжалланган шартнома имзоланган. Шунингдек, битимнинг томонларнинг хоҳиши билан мавсум давомида узайтирилиши мумкинлиги қўшимча қилинган.

Маълумот учун, УЕФАнинг Про лицензиясига эга Войнески Шимолий Македонияда турли тоифадаги ёшлар терма жамоаларида узоқ муддатли фаолияти билан танилган. У 1999—2004 йиллар оралиғида ўсмирлар ва ёшлар терма жамоаларида ишлаган. 2004—09 йилларда эса миллий терма жамоада ёрдамчи мураббий сифатида меҳнат қилган. Асосан Сречко Катанец ва Драго Канатларовскига ёрдам берган. Шундан кейин Туркияда «Элазигспор», «Генчлербирлиги», «Газиантепспор» ва «Ризеспор» клублари мураббийлар штабида фаолият олиб борган. 2019 йил Словакиянинг «Серед» клубида бош мураббий сифатида ишлаган.

Аввалроқ «Пахтакор» «Дарё»га жамоанинг нидерландиялик бош мураббийи Питер Ҳюистра билан ҳамкорлик давом эттирилмаслигини маълум қилганди.