2021 йилда Самарқанд вилоятида 12 та ҳолатда ис гази ва ҳаво-газ аралашмасининг чақнаши билан боғлиқ нохуш ҳолатлар қайд этилган. Унинг оқибатида ис газидан 17 нафар, чақнашдан бир нафар фуқаро вафот этган. Бу ҳақда вилоят Фавқулодда вазиятлар бошқармаси бошлиғи Илҳом Исмоилов билан бўлиб ўтган матбуот анжуманида маълум қилинди, дея хабар бермоқда «Дарё» мухбири.
Шунингдек, 18 нафар фуқародан 4 нафари ис газидан, 14 нафари чақнашдан жабрланган.
Ўтган йилги ис газидан заҳарланиш билан боғлиқ ҳолатларнинг таҳлилига кўра, 2 та ҳолатда турмушда газдан фойдаланиш қоидаларини қўпол равишда бузилиши натижасида содир бўлган. Яъни газ қозонининг мўрисини уйнинг поли остига улаб, ундан иситиш мақсадида фойдаланмоқчи бўлган ёки газ комфоркасини ёққан ҳолда назоратсиз қолдирилиши, ундан иситиш мақсадида фойдаланган.
2021 йилнинг 12 январь куни Каттақўрғон шаҳри «Гўзал» маҳалласи Қозоқовул қишлоғида содир бўлган ачинарли ҳолатда хонадон эгаси газ «котёл»ининг мўрисини уйнинг поли остига улаб, ундан иситиш мақсадида фойдаланганлиги сабаб бўлган.
Бундан ташқари, 3 та ҳолатда қўлбола иситиш печларининг мўриларини тозаланмаслиги, чала ёниш оқибатида заҳарли кимёвий бирикмаларнинг хонадон ичига йиғилиши ва ис газидан ўткир заҳарланишга сабаб бўлган. Ўтган йилнинг 18 октябрь куни Нарпай тумани «Нарпай» маҳалласида содир бўлган бахтсиз ҳодисада ана шундай ҳолат сабаб бўлган.
2 та ҳолатда эса турмушда газдан фойдаланиш қоидаларини қўпол равишда бузилиши, яъни табиий газ тармоқларига ноқонуний уланиш ёки белгиланмаган резина шланглардан табиий газ тармоғини тортиш ҳолатларида ис газидан заҳарланиш ҳолатлари қайд этилган. Шунингдек, газ-ҳаво аралашмасининг чақнаш билан боғлиқ ҳолатларнинг аксарияти (80 фоизи) айнан суюлтирилган табиий газ баллонларидан техника хавфсизлиги қоидаларига амал қилмаган ҳолда фойдаланиш сабаб бўлган.
Илҳом Исмоиловнинг таъкидлашича, 2022 йилнинг ўтган даври мобайнида ис газидан заҳарланиш ва газ-ҳаво аралашмасининг чақнаши билан боғлиқ бахтсиз ҳодисалар қайд этилмаган.
Мавзуга доир:
Изоҳ (0)