Шавкат Мирзиёев ва Эмомали Раҳмон Қозоғистондаги вазиятни муҳокама қилди

Ўзбекистон президенти Шавкат Мирзиёев ва Тожикистон президенти Эмомали Раҳмон 6 январь куни телефон орқали мулоқот қилди.

Президент матбуот хизматининг хабар беришича, суҳбатда давлат раҳбарлари минтақадаги вазият, шу жумладан, қўшни Қозоғистонда вужудга келаётган ҳолат юзасидан фикр алмашди.

Икки мамлакат етакчилари ҳозирги воқеаларнинг иштирокчиси бўлган томонларни вазминликка ва вужудга келган масалаларни тинч йўл билан ҳал қилишга чақирди. Давлат раҳбарлари минтақада тинчлик, барқарорлик ва хавфсизликни таъминлаш борасидаги ҳар томонлама ҳамкорликни ривожлантиришга бундан буён ҳам биргаликдаги саъй-ҳаракатларни қаратишга тайёр эканликларини таъкидлади.

Президентлар Ўзбекистон—Тожикистон стратегик шериклик муносабатларининг долзарб масалаларини ҳам муҳокама қилган.

Бундан аввал Шавкат Мирзиёев Қозоғистондаги вазият бўйича Қосим-Жўмарт Тўқаев билан телефон орқали мулоқот қилганди. Суҳбатда давлат раҳбарлари Қозоғистондаги вазиятнинг ривожланиши, республикадаги ҳолатни барқарорлаштириш, тез фурсатда тинчлик ва осойишталикни қайта тиклаш борасида кўрилаётган чора-тадбирлар юзасидан фикр алмашган.

Ўзбекистон етакчиси Қозоғистоннинг биродар халқи ва раҳбариятини уларнинг мамлакат барқарорлиги ва фаровонлигини таъминлаш йўлидаги саъй-ҳаракатларида доимо қўллаб-қувватлашини яна бир бор тасдиқлаган.

Нималар бўляпти?

Қозоғистондаги норозилик намойишлари автомобиллар учун ёнилғи ҳисобланувчи нефтдан олинадиган газ нархининг кўтарилгани оқибатида 2 январда бошланди. Нархлар 1 литр учун 50-60 тенгедан бирданига 120 тенгега кўтарилди. Ҳукумат буни 1 январдан бошлаб газ нархини белгилаш эркин бозор шартлари асосида амалга оширилиши ва талаб ҳамда таклиф муносабатларига асосланиши билан изоҳлади.

Қозоғистон президенти Қосим-Жўмарт Тўқаев ҳам нархлар пасайиши ҳақида Twitter’да твит қолдирди. Ақтўбе маъмурияти ҳам нарх 50 тенгега тушганини билдирди. Тўқаев «нохолис шахсларнинг даъватларига учмасликка» чақирди. У ижтимоий-иқтисодий хусусиятларга эга талаблар алоҳида ўрганилиши ҳақида ижтимоий тармоқда ёзди.

Кейинчалик Қосим-Жўмарт Тўқаев намойишчиларга яна бир марта мурожаат қилди. Қозоғистон президенти намойиш ўтказаётганлардан провокацияга учмасликни сўраган, митинг ўтказишнинг ҳам ўз қонун-қоидалари борлигини, айниқса ҳиссиётга бериладиган ёшлар қалтис ва қонунга зид ҳаракатлар билан ўз келажагига салбий таъсир кўрсатиб қўйиши мумкинлиги ҳақида огоҳлантирди. Олмаота шаҳри ва Мангистай вилоятида 19 январга қадар фавқулодда ҳолат тартиби жорий қилинди.

Аммо барибир вазият кескинлашишда давом этди ва Қозоғистон президенти ҳукумат истеъфосини қабул қилди. 5 январнинг иккинчи ярмида Тўқаев Қозоғистон халқига яна видеомурожаат йўллади ва Хавфсизлик кенгаши раисининг ваколатларини ҳам қабул қилиб олгани, мамлакатдаги намойишлар ортида молиявий қўллаб-қувватланаётган фитначилар турганини маълум қилди.

Қозоғистондаги воқеалар юзасидан Ўзбекистон Ташқи ишлар вазирлиги баёнот билан чиқиб, ушбу мамлакатда кечаётган сўнгги воқеалар Ўзбекистонда хавотир билан қабул қилингани, вазият ривожи диққат билан кузатиб борилаётганини билдирди. Шунингдек, Ўзбекистоннинг Қозоғистондаги дипломатик ваколатхоналари ватандошлар билан доимий алоқада эканлиги, зарур ҳолатларда Ўзбекистон фуқароларига ҳуқуқий ёрдам кўрсатилаётгани  маълум қилинди.