Ўзбекистоннинг бир нечта шаҳарларидан Қозоғистон вилоятларига парвозлар бекор қилинди. Бу ҳақда Uzbekistan Airways хабар қилди.
Қайд этилишича, 8 январдан 13 январгача режалаштирилган HY761/762/763/764 Тошкент—Олмаота—Тошкент, HY767/768 Самарқанд—Олмаота—Самарқанд, HY9729/9730 Нукус—Ақтўбе—Нукус, HY9725/9726 Урганч—Ақтау—Урганч, HY9727/9728 Нукус—Ақтоу—Нукус йўналишлари бўйича авиақатновлар бекор қилинган.
Парвозлар самолётлар етиб борадиган аэропортларнинг техник сабабларига кўра қолдирилган.
Бекор бўлган парвоз йўловчилари авиачипталарининг тўлиқ қийматини чипта сотиб олинган жойда қайтариб олиш ёки бошқа санага бепул қайта бронлаш ҳуқуқига эга ҳисобланади.
«Тўғри тушунишингизга умид қиламиз», — дейилади хабарда.
Эслатиб ўтамиз, 5 январь куни Ақтауга мунтазам парвозлар бекор қилинди. Кейинроқ Uzbekistan Airways Олмаота ва Ақтўбега режалаштирилган парвозларни ҳам амалга оширмади.
2 январдан бери Қозоғистонда намойишлар бўлиб ўтмоқда. У Қозоғистоннинг Мангистов вилояти Жанаозен шаҳрида автомобиль эгалари суюлтирилган газ нархи икки бараварга (60 тенгедан 120 тенгега) кўтарилганидан норози бўлиб, оммавий митингга чиқиши билан бошланган эди. Шундан кейин намойишлар Ақтау вилояти марказида ҳам бўлиб ўтди, сўнгра Қозоғистоннинг бошқа ҳудудларига, жумладан, пойтахт Нур-Султон шаҳрига ва собиқ пойтахт Олмаотага ҳам тарқала бошлади.
Изоҳ (0)