O‘zbekistonning bir nechta shaharlaridan Qozog‘iston viloyatlariga parvozlar bekor qilindi. Bu haqda Uzbekistan Airways xabar qildi.
Qayd etilishicha, 8-yanvardan 13-yanvargacha rejalashtirilgan HY761/762/763/764 Toshkent—Olmaota—Toshkent, HY767/768 Samarqand—Olmaota—Samarqand, HY9729/9730 Nukus—Aqto‘be—Nukus, HY9725/9726 Urganch—Aqtau—Urganch, HY9727/9728 Nukus—Aqtou—Nukus yo‘nalishlari bo‘yicha aviaqatnovlar bekor qilingan.
Parvozlar samolyotlar yetib boradigan aeroportlarning texnik sabablariga ko‘ra qoldirilgan.
Bekor bo‘lgan parvoz yo‘lovchilari aviachiptalarining to‘liq qiymatini chipta sotib olingan joyda qaytarib olish yoki boshqa sanaga bepul qayta bronlash huquqiga ega hisoblanadi.
“To‘g‘ri tushunishingizga umid qilamiz”, — deyiladi xabarda.
Eslatib o‘tamiz, 5-yanvar kuni Aqtauga muntazam parvozlar bekor qilindi. Keyinroq Uzbekistan Airways Olmaota va Aqto‘bega rejalashtirilgan parvozlarni ham amalga oshirmadi.
2-yanvardan beri Qozog‘istonda namoyishlar bo‘lib o‘tmoqda. U Qozog‘istonning Mangistov viloyati Janaozen shahrida avtomobil egalari suyultirilgan gaz narxi ikki baravarga (60 tengedan 120 tengega) ko‘tarilganidan norozi bo‘lib, ommaviy mitingga chiqishi bilan boshlangan edi. Shundan keyin namoyishlar Aqtau viloyati markazida ham bo‘lib o‘tdi, so‘ngra Qozog‘istonning boshqa hududlariga, jumladan, poytaxt Nur-Sulton shahriga va sobiq poytaxt Olmaotaga ham tarqala boshladi.
Izoh (0)