Самарқанд вилояти Булунғур туманининг собиқ ҳокими Баҳодир Баҳромов вилоят ИИБ Транспортда хавфсизликни таъминлаш бошқармаси бошлиғи лавозимига тайинланди. Бу ҳақда вилоят ИИБ ахборот хизматига хабар берди.
Эслатиб ўтамиз, 2021 йилнинг 22 декабрь куни Булунғур туманида халқ депутатлари туман кенгашининг навбатдан ташқари сессиясида Булунғур тумани ҳокими вазифасида фаолият олиб борган Баҳодир Баҳромов бошқа ишга ўтиши муносабати билан ўз аризасига асосан эгаллаб турган вазифасидан озод этилганди. Унинг ўрнига Самарқанд вилояти прокурори ўринбосари Булунғур тумани ҳокими этиб тайинланган эди.
Таъкидланишича, 5 январь куни Самарқанд вилояти ИИБ Транспортда хавфсизликни таъминлаш бошқармасида ИИВ ТХТББ бошлиғи полковник Р.Тошпўлатов, шунингдек, вилоят ИИБ бошлиғининг ўринбосарлари полковник Ф.Раҳматов ҳамда подполковник Э.Алкаров иштирокида шахсий таркиб ўртасида хизмат интизоми ҳамда қонунчиликка риоя қилиш масалаларига бағишланган учрашув ўтказган.
Учрашув аввалида Самарқанд вилояти ИИБ Транспортда хафвсизликни таъминлаш бошқармаси бошлиғи лавозимига тайинланган подполковник Баҳодир Баҳромов шахсий таркибга таништирилган. Баҳромов Булунғур ҳокими этиб тайинланишидан олдин Самарқанд шаҳар ИИБ бошлиғи вазифасида фаолият юритган.
Шундан сўнг ходимлар томонидан хизматда йўл қўйилаётган камчиликлар танқидий муҳокама қилинган.
Аввалроқ Рустам Қобилов Самарқанд вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари — вилоят туризм ва спорт бош бошқармаси бошлиғи лавозимига тайинлангани тўғрисида хабар берилганди.
Изоҳ (0)