Oliy Majlis Qonunchilik palatasining navbatdagi majlisida “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi ham muhokama qilindi, deb xabar beradi quyi palata matbuot xizmati.
Foto: “Daryo”
Sir emaski, “propiska” so‘zi ma’naviy eskirganligi va ushbu atama fuqarolar ongida “to‘sqinlik qiluvchi”, “bir joyga bog‘langan”, “erkinlikni cheklovchi” degan tushunchalarni keltirib chiqarayotgan edi.
Mazkur qonun loyihasi bilan O‘zbekistonning ayrim qonun hujjatlaridagi “doimiy propiska qilish” tushunchalari “doimiy yashash joyi bo‘yicha ro‘yxatga olish” tushunchalariga hamda “turgan joyi bo‘yicha hisobga olish” tushunchalari “vaqtincha turgan joyi bo‘yicha ro‘yxatga olish” tushunchalariga almashtirilmoqda.
Shuningdek, Ma’muriy javobgarlik to‘g‘risidagi kodeksiga fuqaro ID kartani olish yoki almashtirish yuzasidan o‘z vaqtida murojaat qilmaganida, yaroqsiz holga keltirganda va yo‘qotib qo‘ygan taqdirda ma’muriy javobgarlikka tortilmasligi chiqarib tashlanmoqda. “Davlat boji to‘g‘risida”gi qonunga ko‘paytirilgan miqdordagi davlat boji haqida tushuncha hamda boshqa ko‘plab qo‘shimcha va o‘zgartirishlar kiritilmoqda.
Deputatlarning fikricha, qonun loyihasining qabul qilinishi huquqni qo‘llash amaliyotida “doimiy yashash joyi bo‘yicha ro‘yxatga olish”, “vaqtincha turgan joyi bo‘yicha ro‘yxatga olish” hamda identifikatsiyalovchi ID karta tushunchalari bilan bog‘liq bo‘shliqlarni bartaraf etilishiga olib keladi.
Muhokamalardan so‘ng qonun loyihasi deputatlar tomonidan birinchi o‘qishda qabul qilingan.
Eslatib o‘tamiz, 2020-yil 21-aprelda Shavkat Mirziyoyev Toshkent shahri va viloyatiga doimiy propiska qilishni soddalashtirish haqidagi farmonni imzolagan. 29-aprelda esa Qonunchilik palatasi deputatlari propiska tizimini isloh qilish to‘g‘risidagi qonunni ma’qullagan, 12-may kuni senatorlar propiska tizimiga kiritiladigan o‘zgarishlarni ma’qullagan. Shavkat Mirziyoyev mazkur qonunni 13-may kuni imzoladi.
Shuningdek, Prezident tomonidan 20-mayda imzolangan “‘Davlat boji to‘g‘risida’gi qonunga o‘zgartirish va qo‘shimchalar kiritish haqida”gi qonunga muvofiq, O‘zbekistonda doimiy yashovchi va respublikaning boshqa mintaqalarida doimiy propiskaga ega bo‘lgan O‘zbekiston fuqarolari tomonidan Toshkent shahri va Toshkent viloyatida yangi qurilgan ko‘chmas mulk sotib olinganda mol-mulkning oldi-sotdi shartnomalarini tasdiqlaganlik uchun shartnoma summasining 5 foizi miqdordagi davlat bojining alohida stavkasi bekor qilingan.
