Қашқадарё вилояти Нишон тумани прокурори суд қарорини тан олмаслигини айтиб, собиқ келинининг икки нафар фарзандини тортиб олган. Бу ҳақда «Дарё»га мурожаат қилган келин Дилноза Раҳмонова маълум қилди. Келин бўлиб тушган хонадонидан 2020 йил сентябрида ҳайдалганини айтаётган Дилноза Нишон тумани прокурори сифатида ишлаб келаётган қайнотаси икки нафар фарзандини 2021 йилнинг 25 декабрь куни олиб кетиб, қайтиб олиб келмаганини айтмоқда.
Дилноза Раҳмонова турмуш ўртоғи — Нишон туман прокурорининг ўғли Я.С. билан 2015 йил турмуш қуриб, 2020 йилга қадар бирга яшаган. Турмушидан қонуний ажрашмаса-да, Дилноза айни кунда ёлғиз яшаб келмоқда.
«Турмушимдан икки нафар ўғил фарзандимиз бор. Яшолмай ажрашганимизнинг сабаби шуки, турмуш ўртоғим менга жуда қўпол муносабатда бўларди. Мени одам ўрнида кўрмасди. Ҳар куни дўппосларди. Устига-устак қайнонам ва қайнсинглим ҳам урарди. Ўша хонадонда мени итчалик қадрим бўлмаган. Мен барчасига чидадим, оиламни сақлаб қолишга уриндим. Аммо имкони бўлмади. 2020 йил 8 сентябрь куни ўша хонадондан қувилдим — мени итдек кўчага чиқариб, ҳайдашди», — деди турмуши бузилгани ҳақида гапирган аёл. Дилноза Раҳмонованинг таъкидлашича, у яшаш хонадонидан ёлғиз ўзи, фарзандларисиз қувилган.
«Болаларимни олиб қолишди. Мен эса икки ой худди телбалардек яшадим. Кейин оналик ҳуқуқимни талаб қилиб, Бош прокуратурага мурожаат қилдим, судга бердим. Икки ойдан сўнг дастлаб кичик ўғлимни, кейин каттасини қайтариб олдим. Суд қарорига кўра, собиқ эримга болаларимни кўриш учун ойнинг биринчи ва охирги шанбасида соат 09:00 дан 17:00 га қадар Қарши шаҳридаги уйига олиб кетиб, учрашиш ҳуқуқи берилди. Аммо прокурор қайнотам ва терговчи эрим қонун талабини бузиб, суд қарорига зид равишда болаларимни яна олиб қўйди. Қайнотам суд қарорини тан олмаслигини, болаларимни қайтариб бермаслигини айтмоқда», — дейди Дилноза Раҳмонова.
Аёлнинг қўшимча қилишича, у мазкур масала юзасидан вилоят прокуратурасига қатнайвериб чарчаган. «Муаммони айтиб, улардан ёрдам сўрасак, кимдир қайнотамни устози сифатида ҳурмат қилишини айтса, яна кимдир ундан қўрқишини билдирди. Хуллас, мурожаатимиз ечим топмаяпти. Қарға қарғанинг кўзини чўқимайди деганларидек, вилоят прокуратураси прокурор қайнотамнинг ноқонуний хатти-ҳаракатини жим туриб кузатмоқда», — деди Дилноза Раҳмонова.
МИБ ва прокуратура органлари муносабати
МИБ Қашқадарё вилоят бошқармасидан «Дарё»га маълум қилишларича, мазкур иш бўйича иккита ижро ҳужжати мавжуд эди, ҳозирда ҳар иккала ижро ҳужжати — қайнота ва эрдан болаларни онасига олиб бериш ва эрнинг болалари билан кўришиш ҳуқуқини таъминлаш бажарилгани боис, «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 41-моддасига асосан ижро ишини юритишни тамомлаш тўғрисида қарор қабул қилинган.«Мурожаатчи Дилноза Раҳмоновага ҳозирда Мажбурий ижро бюроси Қарши туман бўлими иш юритувида болани унга олиб бериш бўйича ижро ҳужжати мавжуд эмаслиги ва келгусида бу масала юзасидан судга мурожаат қилиши лозимлиги тушунтирилган», — дейилади МИБнинг вилоят бошқармаси ахборот хизмати тақдим этган маълумотда.
Бош прокуратура ахборот хизмати Нишон туман прокурорининг хатти-ҳаракатлари юзасидан хизмат текшируви тайинланганини маълум қилди.
Изоҳ (0)